Aldadılaraq Rusiyaya döyüşə aparılan azərbaycanlılara 3 min dollar verilir - İDDİA
Son günlər Azərbaycan vətəndaşlarının müxtəlif vədlərlə Rusiyaya aparılaraq Rusiya-Ukrayna müharibəsində iştirak etməyə cəlb edilməsi ilə bağlı iddialar səsləndirilir.
TodayPress TV xəbər verir ki, bu barədə sosial mediada məlumat yayılıb.
Yayılan məlumatlarda bildirilir ki, bəzi şəxslərə Rusiyaya gətirdikləri insanlar qarşılığında təxminən 3 min ABŞ dolları məbləğində ödəniş edilir. İddialara görə, iş və yüksək maaş vədi ilə Rusiyaya aparılan bəzi xarici vətəndaşlar daha sonra hərbi xidmətə və döyüş bölgələrinə göndərilirlər.
Bu mövzuda Perudan və Hindistandan olan vətəndaşların da aldadılaraq Rusiya ordusuna cəlb edilməsi ilə bağlı xəbərlər yayılıb. Həmin ölkələrin Rusiya qarşısında məsələni gündəmə gətirdiyi bildirilir.
Məsələ ilə bağlı sosial şəbəkələrdə paylaşım edən şəxslərdən biri də Rusiyada uzun illər yaşayan tələbə yoldaşının Azərbaycana qayıtdığını qeyd edib. Onun sözlərinə görə, həmin şəxs 8 il Rusiyada yaşadıqdan sonra Bakıya dönüb.
Bundan başqa, Ukraynada yaşayan polkovnik Elxan Nuriyevin də Azərbaycanlı hərbi əsirlərlə bağlı açıqlama verdiyi bildirilir. Nuriyevin sözlərinə görə, son günlərdə bəzi azərbaycanlı əsirlər məhkəmə qarşısına çıxarılıb və onların arasında 4 il müddətinə azadlıqdan məhrum edilənlər olub.
Hazırda sosial şəbəkələrdə yayılan məlumatlarda adı və görüntüsü olan şəxslərin həqiqətən də Rusiya-Ukrayna müharibəsinə cəlb edilib-edilmədiyi barədə müstəqil təsdiqlənmiş məlumat yoxdur.
Türkan İsgəndərli
