Zədələnmiş pul vahidlərini necə dəyişmək olar? - ARAŞDIRMA
Vaxt keçdikcə nağd pul vahidləri - banknotlar və sikkələr aşınır, rəngi solur, bükülür, cırılır və bununla da öz dəyərini itirirlər.
TodayPress TV zədələnmiş pul vahidləri ilə nə etmək, onları harada dəyişdirmək mümkün olduğu və dəyişdirilməyən pullar barədə məlumatları təqdim edir.
Mağazada qəbul olunan banknotlar
Cırılmış pullar bankomat tərəfindən qəbul edilmir. Bəzən isə ticarət obyektləri və ya kafe də hətta az miqdarda zədələnmiş banknotları qəbul etməkdən imtina edə bilər. Belə hallar hər zaman qanuni deyil: mağaza və ictimai iaşə obyektlərində kiçik qüsurlu banknotlarla da ödəniş etmək mümkündür.
Məsələn, aşağıdakı banknotlar məqbul sayılır və qəbul olunur:
kirli və ya yırtılmış;
köhnəlmiş, kiçik deşikləri, yad yazıları, ləkələri, möhürləri olan;
kənarları zədələnmiş.
Banknotdakı zədələr seriya nömrəsinin oxunmasına mane olmamalıdır.
Bəs hansı banknotlar dəyişdirilə bilər?
Bankda cırılmış banknotları sağlamları ilə dəyişdirmək mümkündür, əgər seriya nömrəsi qorunubsa və banknot:
ilkin sahəsinin 45%-dən çoxunu itirməyibsə;
bir neçə parça yapışdırılaraq bərpa olunubsa;
iki ayrı banknotun parçalarından ibarətdirsə (amma nominal eyni olmalıdır);
rəngi və ultrabənövşəyi işıq altında parlaqlığı dəyişibsə, lakin təsvirlər aydın görünürsə;
istehsal qüsuru varsa.
Hansı sikkələr dəyişdirilir?
əyilmiş, sıxılmış, kəsilmiş, deşikli, ərimiş və ya rəngi dəyişmiş, amma ilkin çəkisinin 75%-ni saxlamış;
istehsal qüsuru olan sikkələr.
Hansı banknotlar dəyişdirilməyəcək?
saxtakarlıq əlamətləri daşıyanlar;
qatlanan banknotlar;
dövriyyədən çıxarılmış pul vahidləri.
Zədələnmiş banknotları harada və necə dəyişmək olar?
Azərbaycan Mərkəzi Bankının buraxdığı zədələnmiş pullar hər hansı nağd əməliyyat aparan bankda qəbul olunur. Kassa işçisi pulların etibarlılığından əmin olduqda onları dərhal dəyişir. Əks halda, banknot ekspertizaya göndərilir və müştəriyə ödənişin nağd və ya bank hesabına köçürmə ilə alınması barədə sənəd verilir.
Ekspertizadan sonra üç nəticə ola bilər:
Pul vahidi ödəniş qabiliyyətli hesab olunaraq dəyişdirilir.
Pul vahidi ödəniş qabiliyyətli deyil – müştəri onu geri ala bilər.
Saxta pul aşkar olunursa, polisə təhvil verilir.
Bütün əməliyyatlar komissiyasız həyata keçirilir.
Cırılmış banknotla nə etmək lazımdır?
Özünüz təmir etməyə çalışmayın – məsələn, yapışqan lentlə bərkitsəniz, bankomat və ya kassada qəbul olunmaya bilər. Zədələnmiş banknotlar bankda ekspertizaya göndərilərək qüsurlar aradan qaldırılır.
Töhfə Səməd
