Daimi diş yerindən çıxarsa, onu xilas etmək mümkündür: Nə etmək lazımdır?

Zərbə nəticəsində daimi diş yerindən çıxarsa, bu, onun mütləq itirilməsi demək deyil. Vaxtında və düzgün müdaxilə edildikdə dişi yenidən yerinə yerləşdirərək qorumaq mümkün ola bilər.

TodayPress TV xəbər verir ki, diş yerindən tamamilə çıxıbsa, onu yalnız tac hissəsindən tutmaq, kökünə toxunmamaq lazımdır.

Diş çirklənibsə, süd və ya fizioloji məhlulla yüngül şəkildə yaxalana bilər. Lakin onu ovuşdurmaq, kökünü qaşımaq və antiseptiklərlə təmizləmək olmaz.

Mümkündürsə, diş ehtiyatla əvvəlki yerinə qaytarılmalı və dərhal stomatoloqa müraciət edilməlidir. Əgər dişi yerinə yerləşdirmək mümkün deyilsə, onun qurumasına yol verməmək vacibdir. Bu halda dişi süd və ya fizioloji məhlulda saxlamaq olar.

Mütəxəssislər dişi buzda, spirtli içkilərdə və ya quru salfetdə saxlamağın düzgün olmadığını bildirirlər. Kök səthindəki canlı hüceyrələr qurumağa çox həssasdır və vaxt keçdikcə dişin uğurla bərpa olunması ehtimalı azalır.

Türkan İsgəndərli

TodayPress TV