60 yaşdan sonra səhər yeməyində bunu yeyin: Əzələləri və sümükləri qoruyur

60 yaşdan sonra orqanizmin zülala olan tələbatı artır. Yaş artdıqca əzələ kütləsi təbii olaraq azalır, sümüklər isə daha kövrək olur. Bu səbəbdən zülalla zəngin qidaların rasiona daxil edilməsi vacib hesab olunur.

TodayPress TV xəbər verir ki, “Nosalty” nəşrinin məlumatına görə, 60 yaşdan yuxarı insanlar üçün səhər yeməyində yulaf sıyığından daha faydalı seçimlərdən biri yunan yoqurtu ola bilər.

Mütəxəssislərin fikrincə, zülal əzələlərin əsas “tikinti materialı” olmaqla yanaşı, toxumaların bərpası, immun sisteminin normal fəaliyyəti və sümük sağlamlığı üçün də əhəmiyyətlidir. Yaşlı insanlarda orqanizmin zülalı mənimsəmə qabiliyyəti zəiflədiyindən gün ərzində kifayət qədər zülal qəbuluna diqqət yetirmək tövsiyə olunur.

Yunan yoqurtu zülalla yanaşı, kalsiumla da zəngindir. Bu isə sümüklərin sağlamlığının qorunması baxımından əhəmiyyətlidir. Tərkibindəki canlı bakteriyalar bağırsaq mikroflorasının balansının qorunmasına da kömək edə bilər.

Nəşr bildirir ki, zülalla zəngin səhər yeməyi daha uzun müddət toxluq hissi yarada, gün ərzində qəlyanaltılara ehtiyacı azalda və enerji səviyyəsinin daha stabil qalmasına kömək edə bilər.

Yunan yoqurtunu daha qidalı etmək üçün ona təzə giləmeyvə və ya mövsümi meyvələr, yulaf, qoz-fındıq, badam, az miqdarda darçın və ya bal əlavə etmək olar.

Mütəxəssislər şəkər əlavə edilməmiş, təbii yunan yoqurtlarına üstünlük verməyi tövsiyə edirlər. Belə səhər yeməyinin zülal, lif, vitamin və minerallarla zəngin olduğu qeyd olunur.

Kübra Musayeva