Mumiyadan çörək bişirildi - 5300 illik “möcüzə
Alimlər 5300 il əvvəl yaşamış məşhur Buz Adam Ötzinin mumiyasından əldə edilən qədim maya ilə çörək bişirməyə nail olublar.
TodayPress TV xəbər verir ki, bu barədə "Daily Mail" məlumat yayıb.
1991-ci ildə Alp dağlarında tapılan Ötzi mumiyası üzərində aparılan son araşdırmalar zamanı onun dərisində, daxili toxumalarında və mədə tərkibində canlı mikroorqanizmlərin izləri aşkarlanıb. Tədqiqatçılar burada qədim bağırsaq bakteriyaları ilə yanaşı, çox aşağı temperaturda yaşaya bilən maya növü də müəyyən ediblər.
Alimlər bu mayanı laboratoriya şəraitində yetişdirərək un mühitinə uyğunlaşdırıblar. Bir neçə aylıq təcrübələrdən sonra mikroorqanizm adi çörəkçi mayası kimi fəaliyyət göstərməyə başlayıb.
Nəticədə tədqiqatçılar qədim mayadan istifadə edərək xəmir hazırlayıb və mayalı çörək bişiriblər. Araşdırmanın rəhbəri Məhəmməd Sərhanın sözlərinə görə, xəmir təxminən bir gün ərzində qalxıb və çörəkbişirmə üçün yararlı olub.
Mütəxəssislər gələcəkdə bu qədim mayalardan pivə və digər fermentləşdirilmiş məhsulların hazırlanmasında istifadə imkanlarını da araşdırmağı planlaşdırırlar.
Türkan İsgəndərli
