İsti havada necə sərinləmək olar? - Həkimdən faydalı məsləhətlər
İsti günlərdə rahat yuxuya getmək üçün yataq dəstini beş dəqiqəlik dondurucuya yerləşdirmək tövsiyə olunur.
TodayPress TV xəbər verir ki, bu faydalı üsul barədə "NEWS.ru" nəşrinə müsahibəsində terapevt Yelena Pavlova danışıb.
Mütəxəssis bildirib ki, bədən hərarətini azaltmaq məqsədilə topuq və biləkləri sərin su ilə yumaq da olduqca səmərəlidir:
"Yuxuya getməzdən əvvəl döşəkağını polietilen paketə bükərək dondurucuda beş dəqiqə saxlayın. Bu üsul sizə bir neçə saatlıq sərinlik bəxş edəcək. Həmçinin pəncərələrdən yaş parça asmaq və ya şüşələrə günəş şüalarını qaytaran folqa yapışdırmaq olar. Əgər kondisioneriniz yoxdursa, sərinkeşin önünə içi buzla dolu qab qoyun; bu zaman otağa sərin və nəm hava axını yayılacaq. Bədəni sürətlə soyutmaq üçün boyun, bilək və topuq nahiyələrini soyuq suda saxlayın, çünki iri qan damarları məhz bu hissələrdən keçir. Özünüzlə tərkibində aloe-vera şirəsi və ya bir neçə damcı nanə yağı olan su spreyi daşıya bilərsiniz. Metro stansiyalarında platformanın giriş-çıxış qapılarının ağzında dayanmaqdan qaçın, çünki orada havalandırma daha zəifdir. Yaxşı olar ki, hava axınının daha çox olduğu vaqonun mərkəzinə keçəsiniz".
Eyni zamanda, ekspert saat 12:00-dan 16:00-dək küçəyə çıxmamağı məsləhət görür. Çünki bu saatlarda, hətta kölgədə belə asfalt örtüyü həddindən artıq qızır.
Terapevtin qənaətinə görə, bədənin qəfil buzlu su ilə isladılması temperatur dəyişməsinə səbəb olaraq günvurmaya və qan damarlarının spazmına yol aça bilər. Bununla yanaşı, sinir və əzələlərin soyuqlamaması üçün sərinkeşin qarşısında geyimsiz və birbaşa hava axınının altında oturmamaq xüsusi olaraq tövsiyə edilir.
