Gündüz vaxtı görünə biləcək nadir kometa aşkarlandı

Atakama səhrasında yerləşən uzaqdan idarə olunan teleskop vasitəsilə 13 yanvar 2026-cı ildə aşkar edilən “C/2026 A1” (MAPS) kometası astronomiya dünyasında böyük maraq doğurub.

TodayPress TV xəbər verir ki, bu barədə “TRT Haber” məlumat yayıb.

Araşdırmalar göstərib ki, bu səma cismi tarixdə ən möhtəşəm kometaları ilə tanınan “Kreutz” ailəsinə daxildir və minilliklər əvvəl nəhəng bir ana kütlədən qopan parçalardan biridir.

Məlumata görə, MAPS kometası aprel ayının əvvəlində Günəş səthinə təxminən 120 min kilometr məsafəyə qədər yaxınlaşacaq. “Günəşə toxunanlar” (sungrazers) adlandırılan bu tip kometalar adətən Günəşin yüksək temperaturuna tab gətirə bilməyərək tamamilə buxarlanır və ya çox qısa müddət ərzində son dərəcə güclü parlaqlıq yaradaraq unikal vizual mənzərə ortaya qoyur.

Alimlər bildirir ki, əgər MAPS bu təhlükəli keçidi parçalanmadan keçə bilsə, aprel ayının ortalarında səmada nadir müşahidə edilən bir mənzərə yaranacaq. Hətta kometanın Günəşə ən yaxın olduğu anlarda gündüz vaxtı belə gözlə görünəcək qədər parlaq ola biləcəyi ehtimal edilir.

Aysel Mətləb