Alimlər: "İnsanlar 60 min il əvvəl abstrakt düşünə bilib"

Alimlər müəyyən edib ki, qədim insanlar hələ 60 min il əvvəl abstrakt və həndəsi düşünmə qabiliyyətinə malik olublar.

TodayPress TV xəbər verir ki, bu nəticə Cənubi Afrikada tapılmış dəvəquşu yumurtası qabıqları üzərindəki naxışların araşdırılması nəticəsində əldə olunub.

Tədqiqat "PLOS One" jurnalında dərc edilib.

Araşdırmaya görə, bu qabıqlar qədimdə su qabı kimi istifadə olunub, lakin alimlərin diqqətini üzərindəki naxışlar — düz xətlər, torvari strukturlar və romb fiqurları cəlb edib.

Tədqiqatçılar 112 fraqment və 1300-ə yaxın xətti analiz ediblər. Nəticədə naxışların 80 faizdən çoxunun ciddi struktur qaydalarına uyğun olduğu müəyyən edilib — paralel xətlər, düz bucaqlar və təkrarlanan elementlər müşahidə olunub.

Alimlərin fikrincə, bu xətlər təsadüfi deyil, planlı və sistemli şəkildə yaradılıb. Qədim insanlar elementləri döndərmək, birləşdirmək və təkrarlamaq kimi mürəkkəb düşünmə əməliyyatlarından istifadə ediblər.

Tədqiqat müəllifləri bildirirlər ki, bu tapıntılar "Homo sapiens"də abstrakt düşüncənin formalaşdığını göstərir. Bu qabiliyyət isə sonradan incəsənət, simvolika və yazının yaranmasının əsasını təşkil edib.

Bununla belə, naxışların konkret mənası hələ də məlum deyil — onlar həm dekorativ, həm də simvolik xarakter daşıya bilər.

Qiymət Mahir