Solğun dırnaqlar xəstəlik əlaməti ola bilər
Solğun dırnaqlar anemiyanın əlaməti ola bilər
TodayPress TV "Gazeta.ru"ya istinadən xəbər verir ki, bunu həkim Cüzeppe Aragona bildirib.
O qeyd edib ki, dırnaqların rəngində, formasında və quruluşunda dəyişikliklər – məsələn, saralma, ağarma, kövrəklik və ya tünd zolaqlar – əsas sağlamlıq problemlərinin göstəricisi ola bilər.
Onun sözlərinə görə, dırnaq lövhəsinin vəziyyəti bəzən həm zərərsiz, həm də ciddi sağlamlıq problemlərini aşkar etməyə kömək edir. Məsələn, sarı dırnaqlar əksər hallarda göbələk infeksiyasının əlamətidir. Kövrək və çatlamış dırnaqlar dəmir çatışmazlığının göstəricisi ola bilər və ya məişət kimyəvi maddələrinə məruz qalma nəticəsində əmələ gələ bilər. Solğun dırnaqlar bəzən anemiyanın, daha aydın dəyişikliklər isə qaraciyər xəstəliklərinin əlaməti ola bilər.
Həkim tünd zolaqlara və dırnaq şəklindəki nəzərəçarpacaq dəyişikliklərə xüsusi diqqət yetirməyi tövsiyə edir. Nadir hallarda tünd zolaqlar melanoma əlaməti ola bilər, dırnaq lövhəsinin qalınlaşması və deformasiya isə ağciyər və ya ürək xəstəliklərinin göstəricisi ola bilər. Mütəxəssis vurğulayıb ki, bu əlamətləri digər simptomlar və ümumi sağlamlıq vəziyyəti ilə birlikdə qiymətləndirmək vacibdir.
Aragona əlavə edib ki, bütün dırnaq dəyişiklikləri təhlükəli deyil. Məsələn, ağ ləkələr əksər hallarda kiçik zədələnmələrdən qaynaqlanır, şaquli zolaqlar isə yaşla əlaqədar inkişaf edir. Lakin dəyişikliklər davamlı və ya qeyri-adi olarsa, həkim mümkün əsas xəstəlikləri istisna etmək üçün mütəxəssislə məsləhətləşməyi tövsiyə edir.
Jalə Rövşən
