Diqqət: qara kifin insan həyatına zərərləri açıqlandı

Qara kif burun, boğaz və qulaqlara asanlıqla təsir göstərir. Xüsusilə antibiotiklərlə özünü müalicə etmək infeksiyanı daha da təhlükəli edə bilər.

TodayPress TV   "Gazeta.ru"-ya istinadən xəbər verir ki, bunu otolarinqoloq və yüksək kateqoriyalı həkim Vladimir Zaitsev  bildirib.

“İnsan bədəni daim çoxsaylı mikrofloralara — mikroviruslara, bakteriyalara və hətta göbələklərə məruz qalır. Bəzi mikrofloralar insanlar üçün patogendir, yəni bədəndə xəstəlik törədə bilir, digərləri isə son dərəcə patogen — dağıdıcıdır. Demək olar ki, bütün KBB orqanları olduqca həssasdır. Xarici eşitmə kanalı, burun boşluğu, nazofarenks, arxa faringeal divar, badamcıqlar və paranazal sinuslar — çənə, frontal, etmoid və sfenoid — patogen floranın inkişafı üçün əlverişli sahələrdir. Qara kif xarici eşitmə kanalına, burun sinusuna və ya nazofarenksə daxil olduqda, heç bir maneə ilə üzləşmir. Əksinə, yüksək rütubət və oradakı sporlar kif üçün ideal çoxalma mühiti yaradır”, — deyə Zaitsev izah edib.

Həkimin sözlərinə görə, qara kifin bədənə daxil olmasının qarşısını almaq üçün yalnız mətbəx və vanna otağında deyil, bütün otaqlarda gigiyena qaydalarına əməl etmək lazımdır.

“Təmiz həyat tərzi sürməlisiniz. Şəxsi gigiyena qaydalarına riayət etmək və immuniteti gücləndirmək vacibdir. Aktiv həyat tərzi, sağlam qidalanma və kifayət qədər yuxu insan sağlamlığı üçün əsas şərtlərdir. Amma belə bir şübhəniz varsa, özünüzü müalicə etməyin; mütəxəssisə müraciət edin. Çünki bəzən patogen bədəndə kök saldıqda vəziyyət çətinləşir və hətta həkim çarəsiz qalır. Simptomların ilk əlamətində dərhal həkimə müraciət etmək çox kömək edə bilər”, — deyə Zaitsev vurğulayıb.

O həmçinin qeyd edib ki, qara kif infeksiyasından şübhələnirsinizsə, özünü antibiotiklə müalicə etmək qəti qadağandır.

“İnsanlar antibakterial dərmanlar haqqında məlumatlıdır. Reseptsiz onları almaq praktiki olaraq mümkün deyil, amma bəzən insanlar patogen olduğunu düşünərək antibiotik qəbul etməyə başlayırlar. Bu isə vəziyyəti daha da pisləşdirir. Antibiotik qəbul etdikdə bakterial flora məhv olur və göbələk — qara kif onun yerini tutur. Lazım olan güclü göbələk əleyhinə terapiya və göbələklə təmasda olan yerlərin güclü antiseptik müalicəsidir. Bundan başqa, göbələk ultrasəsdən qorxur və onun təsiri ilə məhv olur. Digər bir üsul isə krio-cərrahiyyadır. Qara kif son dərəcə aşağı temperaturlara da davam gətirə bilmir”, — deyə həkim yekunlaşdırıb.

Jalə Rövşən 

TodayPress TV