Neptun ətrafındakı kiçik planetdə ilk dəfə atmosfer aşkarlandı

Neptun orbitindən xeyli uzaqda yerləşən "2002 XV93" adlı kiçik planetin seyrək qaz örtüyünə malik olduğu müəyyən edilib.

TodayPress TV xəbər verir ki, bu barədə "Nature Astronomy" jurnalında dərc olunan məqalədə məlumat verilib.

Alimlər qeyd edirlər ki, indiyədək atmosferə malik yeganə trans-Neptun obyekti (Neptundan daha uzaqda yerləşən cisim) Pluton hesab olunurdu. "2002 XV93"də çox seyrək qaz örtüyünün izlərinin aşkarlanması sübut edir ki, hətta bu cür kiçik obyektlər belə müvəqqəti atmosfer saxlaya bilər.

Tədqiqat Yaponiyanın Milli Astronomiya Rəsədxanasının əməkdaşı Ko Arimatsunun rəhbərliyi ilə aparılıb. "2002 XV93" Günəşdən təxminən Pluton qədər məsafədə yerləşir və diametri 488-550 km arasındadır. Cismin səthinin çox qaranlıq olduğu və əsasən donmuş qazlardan ibarət olduğu güman edilir.

Üç yüksək həssaslığa malik teleskop vasitəsilə aparılan müşahidələr nəticəsində göy cisminin ətrafında seyrək qaz örtüyünün mövcudluğu təsdiqlənib.

Hesablamalara görə, bu atmosfer Yer atmosferindən 5-10 milyon dəfə daha seyrəkdir və bir neçə min il ərzində kosmosa yayılaraq yox olacaq. Alimlərin fikrincə, atmosferin mövcudluğu ya daxili aktivliklə, ya da son vaxtlarda baş vermiş kometa toqquşması ilə bağlı ola bilər.

TodayPress TV