“Kokain” köpəkbalıqları alimləri təəccübləndirdi

Baham adalarındakı Keyp Eleuthera İnstitutunun alimləri ölkə sahillərində yaşayan köpəkbalıqlarında kofein, kokain və ağrıkəsicilərin izlərini aşkar ediblər.

TodayPress TV xəbər verir ki, bu barədə "Science News"da məqalə dərc olunub. 

Test edilən 85 heyvandan 27-sinin qanında kofein, ikisində kokain, 13-ündə diklofenak və dördündə parasetamol aşkar olunub. Bu maddələrin ən yüksək səviyyəsi turist axınının çox olduğu ərazilərdə yaşayan köpəkbalıqlarda müşahidə edilib ki, bu da insan fəaliyyətinin ekosistemə təsirini göstərir.

Tədqiqat həmçinin köpəkbalıqlarının metabolik parametrlərində, o cümlədən laktat və karbamid səviyyələrində dəyişikliklər göstərib, bu da heyvanların kimyəvi maddələrə məruz qaldığını sübut edir.

Tədqiqatın aparıcı müəllifi Nataşa Voznikin bildirib ki, köpəkbalıqları üzgüçülük zamanı obyektləri araşdırarkən bu maddələrlə təmasa girirlər. Okeana düşən kimyəvi maddələr, o cümlədən dərmanlar, əksər hallarda çirkab suları və zibilxanalar vasitəsilə daxil olur — bəzi dərmanlar insan bədənində tam parçalanmır və suya düşür.

Alimlər qeyd edirlər ki, köpəkbalıqları normal davranıblar və heç bir intoksikasiya əlaməti göstərməyiblər, buna görə də “kokain köpəkbalığı hücumu” təhlükəsi yoxdur. Əsas risk ekosistemin çirklənməsidir ki, bu, dəniz həyatına və uzunmüddətli perspektivdə dəniz məhsulları istehlak edən insanlara mənfi təsir göstərə bilər.

Jalə Rövşən 

TodayPress TV