BƏƏ-də 2026-cı il “Ailə ili” elan edildi

Birləşmiş Ərəb Əmirliklərinin (BƏƏ) Azərbaycandakı fövqəladə və səlahiyyətli səfiri Məhəmməd Əl Bluşi ölkəsinin 2026-cı il vizyonu və milli prioritetləri barədə açıqlama verib.

TodayPress TV xəbər verir ki, səfirin məlumatına görə, BƏƏ Prezidenti Şeyx Məhəmməd bin Zayed Əl Nəhyanın göstərişi ilə cari il ölkədə “Ailə ili” elan olunub.

Ailə – Cəmiyyətin və İnkişafın Dayağı

Diplomat vurğulayıb ki, ailə institutu 1971-ci ildə dövlət yaradıldığı gündən bəri BƏƏ rəhbərliyinin əsas diqqət mərkəzindədir. Onun sözlərinə görə, bu siyasət BƏƏ Konstitusiyasında da öz əksini tapıb və qurucu ata Şeyx Zayed bin Sultan Əl Nəhyanın "Ailə istənilən güclü cəmiyyətin təməlidir" fəlsəfəsinə söykənir.

Səfir qeyd edib ki, heç bir sivilizasiya möhkəm ailə təməli olmadan tərəqqi edə bilməz: "Ailə ili bizə xatırladır ki, bu gün ailələrimizə göstərdiyimiz qayğı və həmrəylik daha güclü bir cəmiyyət və uşaqlarımızın arzularına layiq bir gələcək yaradacaq".

Strateji Hədəflər və "2031 Milli Gündəliyi

Məhəmməd Əl Bluşi builki təşəbbüsün xüsusi institusional  mexanizmlərlə dəstəkləndiyini diqqətə çatdırıb.

Milli Gündəlik: Təşəbbüs “Əmirlik Ailələrinin İnkişafı üzrə 2031-ci ilə qədər Milli Gündəlik” çərçivəsində həyata keçirilir.

İdarəetmə: Ailə İşləri Nazirliyi və 20-dən çox federal-yerli hökumət qurumundan ibarət işçi qrupu bu prosesdə iştirak edir.

Dəyərlərin Ötürülməsi: Əsas məqsəd əməkdaşlıq və qarşılıqlı həmrəylik kimi köklü dəyərləri gələcək nəsillərə aşılamaqdır.

Ramazan Ayının Mənəvi Təsiri

Mübarək Ramazan ayının bu təşəbbüslə üst-üstə düşməsinə toxunan səfir bu ayın ailə bağlarını möhkəmləndirmək üçün müstəsna fürsət olduğunu bildirib. İftar süfrələrinin ailə üzvlərini bir araya gətirdiyini, ünsiyyəti və birlik hissini dərinləşdirdiyini vurğulayan diplomat, Ramazanın mənəvi dəyərlərlə ictimai əlaqələri birləşdirən xüsusi bir dövr olduğunu qeyd edib.

Qiymət Mahir