"Apple" keçmiş əməkdaşını Oppo-ya gizli məlumat ötürməkdə ittiham edir

“Apple” şirkəti sabiq əməkdaşı Çen Şiyə qarşı məhkəmə iddiası qaldırıb. O, işdən ayrıldıqdan sonra Çinin “Oppo” şirkətində fəaliyyətə başlayıb.

TodayPress TV xəbər verir ki, “The Verge”in məlumatına görə, iddiada Şinin “Apple Watch” ağıllı saatlarının hazırlanması ilə bağlı məxfi sənədlərə çıxışı olduğu bildirilir. 

Şirkət iddia edir ki, o, işdən çıxmazdan əvvəl qorunan korporativ qovluqdan 63 sənədi şəxsi USB yaddaşa köçürüb. Hətta “Oppo”ya göndərdiyi mesajda yeni vəzifəsində istifadə etmək üçün “maksimum həcmdə məlumat topladığını” yazıb.

“Apple”in hüquqşünasları qeyd edirlər ki, Şi işdən ayrılmazdan əvvəl “Apple Watch”un texniki komandasının bir çox iclaslarında iştirak edib. Onun xidməti “MacBook” vasitəsilə korporativ fayllarla bağlı izləri gizlətmək üçün axtarış etdiyi də məlum olub. Buraya “MacBook"dan məlumatların necə silinməsi” və “ümumi diskdə faylı açdığımı kim görə bilərmi” kimi sorğular daxil olub. Bu məlumatlar Şinin şirkətdə qoyub getdiyi cihazlardan aşkarlanıb.

Şi isə istefa ərizəsində şəxsi və ailəvi səbəbləri göstərib, “Oppo”ya keçidi barədə məlumat verməyib. Çin şirkəti hadisə ilə bağlı hələ şərh açıqlamayıb.

Qiymət Mahir