Macarıstanda Orbana qarşı kütləvi etirazlar keçirilir

Macarıstanın Baş naziri Viktor Orban Budapeştin mərkəzində minlərlə insanın iştirakı ilə keçirilən etiraz aksiyaları fonunda ciddi ictimai narazılıqla üzləşib.

TodayPress TV xəbər verir ki, bu barədə "Euroactiv" məlumat yayıb.

Məlumata görə, etirazlara səbəb dövlət tərəfindən idarə olunan yetkinlik yaşına çatmayanların saxlanma mərkəzlərində uşaqlara qarşı fiziki zorakılığı əks etdirən videoların yayılması olub. Hadisə milli seçkilərə cəmi dörd ay qalmış ictimaiyyətə açıqlanıb.

Orban hökuməti videolardan sonra bu mərkəzləri polis nəzarətinə götürüb və rəsmi araşdırmaya başlayıb. Lakin müxalifət bu addımların kifayət etmədiyini, mərkəzlərdə sistemli problemlər və korrupsiya olduğunu iddia edir.

Mərkəzçi müxalif "Tisza" partiyasının lideri Peter Magyar bildirib ki, on minlərlə insan uşaqların müdafiəsi və onların təhlükəsizliyi ilə bağlı narahatlığını ifadə etmək üçün etiraza qoşulub. Onun sözlərinə görə, dövlət himayəsində olan hər beş uşaqdan biri zorakılığa məruz qalır. Orbanın ofisi isə bu iddianı təkzib edib.

Peter Magyar qarşıdan gələn seçkilərdə Viktor Orbanın əsas rəqibi kimi göstərilir.

Türkan İsgəndərli

TodayPress TV