Yerimək beynin səslərə reaksiyasını gücləndirir

Çin və Almaniyadan olan alimlər müəyyən ediblər ki, yerimək insan beyninin səslərə qarşı həssaslığını artırır və bu reaksiya hərəkətin istiqamətindən asılı olaraq dəyişir.

TodayPress TV xəbər verir ki, araşdırma "The Journal of Neuroscience" jurnalında dərc olunub.

Əvvəllər hərəkətin görmə qabiliyyətinə təsiri məlum idi, lakin onun eşitməyə necə təsir göstərdiyi aydın deyildi.

"Mobil EEG" cihazları taxan iştirakçılar səkkiz şəkilli trayektoriya boyunca hərəkət edərək sağ və sol qulaqlarında müxtəlif tezlikli səsləri dinləyiblər. Nəticələr göstərib ki, yeriyərkən beyin səslərlə daha yaxşı sinxronlaşır. Xüsusilə sağa dönərkən sağ qulaqdan gələn səsə, sola dönərkən isə sol qulaqdan gələn səsə beyin daha güclü reaksiya verir.

İkinci mərhələdə iştirakçılara qəfil qısa səslər təqdim olunub. Məlum olub ki, yeriyərkən beyin bu qəfil səslərə daha həssas reaksiya göstərir, xüsusilə də səs yan tərəfdən gəlirsə.

Alimlərin fikrincə, bu mexanizm beynin mühitdə daha effektiv naviqasiya etməsinə və gözlənilməz səslərə daha tez cavab verməsinə kömək edir. Kəşf gələcəkdə naviqasiya və eşitmə texnologiyalarının inkişafında istifadə oluna bilər.

Türkan İsgəndərli

TodayPress TV