Kanadalı alimlərdən gənc yaşda valideyn olanlarla bağlı mühüm araşdırma
Kanadalı alimlərin araşdırmasına görə, erkən yaşda valideyn olan şəxslərin övladları gələcəkdə bir sıra problemlərlə üzləşə bilərlər.
TodayPress TV xəbər verir ki, bu barədə "PLOS One" jurnalında məlumat dərc olunub.
Məlumata görə, yeniyetməlik dövründə və ya iyirmi yaşın əvvəllərində ilk uşağın dünyaya gəlməsi sonrakı həyatda aşağı təhsil səviyyəsi, az gəlir və zəif sağlamlıq vəziyyəti ilə əlaqəli ola bilər.
Tədqiqatçılar erkən yaşda valideyn olmağın mənfi təsirlərini araşdırmaq üçün 6,2 mindən çox şəxsin məlumatlarından istifadə ediblər. Onlar ilk bioloji uşağın dünyaya gəlmə yaşını təhsil səviyyəsi, gəlirlər, fiziki və psixi sağlamlıq, həmçinin həyatdan ümumi məmnunluq səviyyəsi ilə müqayisə ediblər.
Araşdırma zamanı məlum olub ki, ən ciddi çətinliklər 16 yaşında valideyn olmuş şəxslərdə müşahidə edilib. Onların yalnız təxminən 40%-i orta məktəbdən yuxarı təhsil ala bilib.
Qeyd olunub ki, ilk valideynlik yaşı artdıqca ali və ya orta ixtisas təhsili alma ehtimalı da nəzərəçarpacaq dərəcədə yüksəlib və təxminən 31 yaşa qədər sabitləşib.
Oxşar mənzərə gəlirlərlə bağlı göstəricilərdə də müşahidə olunub. Yeniyetməlik dövründə valideyn olan şəxslər daha çox aşağı gəlir qrupuna daxil olublar. Maliyyə vəziyyəti isə uşağın doğulmasını 26-31 yaşa qədər təxirə salan insanlarda tədricən yaxşılaşıb.
Bundan əlavə, erkən valideynliyin sonrakı yaşlarda fiziki sağlamlığın daha zəif qiymətləndirilməsi ilə əlaqəli olduğu müəyyən edilib. Bu asılılıq ilk uşağın doğulma yaşı artdıqca zəifləyib və təxminən 26 yaşdan sonra sabitləşib.
Bununla yanaşı, həyatdan ümumi məmnunluq səviyyəsinin valideynlik yaşından demək olar ki, asılı olmadığı bildirilib. İştirakçıların əksəriyyəti yaşından asılı olmayaraq öz həyatını yüksək qiymətləndirib.
Tədqiqat müəlliflərinin sözlərinə görə, nəticələr gənc valideynlərin "uğursuzluğa məhkum olduğu" anlamına gəlmir. Araşdırma daha çox ailə, cəmiyyət və dövlət dəstəyinin nə qədər vacib olduğunu göstərir.
Alimlər həmçinin hesab edirlər ki, erkən valideynlik təhsilin başa çatdırılması və ya karyeraya başlanması kimi mühüm həyat mərhələlərinə mənfi təsir göstərə bilər.
