İlon Mask iki ən iddialı şirkətini birləşdirir

Amerikalı milyarder İlon Maskın “SpaceX” şirkəti süni intellekt (AI) sahəsində fəaliyyət göstərən “xAI”ni satın aldığını açıqlayıb.

TodayPress TV xəbər verir ki, bu barədə Mask “SpaceX”in veb saytında açıqlama verib.

“Bu, təkcə növbəti mərhələ deyil, “SpaceX” və “xAI”nin missiyasında tamamilə yeni bir kitabın başlanğıcıdır”, - deyə iş adamı bildirib.

Mütəxəssislərin fikrincə, bu birləşmə “xAI”nin sürətlə inkişaf edən süni intellekt bazarında rəqabət aparmaq üçün daha çox maliyyə resursuna ehtiyac duyduğunu, eyni zamanda AI texnologiyalarının gələcək kosmik tədqiqatlarda mühüm rol oynayacağını göstərir.

“PitchBook” araşdırma şirkətinin məlumatına əsasən, 2025-ci ilin dekabrında həyata keçirilən ikinci dərəcəli səhm satışından sonra “SpaceX”in dəyəri 800 milyard dollar, “xAI”nin dəyəri isə 2026-cı ilin yanvarında baş tutan son maliyyələşmə raundundan sonra 230 milyard dollar olaraq qiymətləndirilib.

Qeyd olunur ki, bu addım texnologiya nəhənglərinin süni intellektin inkişafı üçün daha çox hesablama resursu əldə etmək uğrunda apardıqları rəqabəti də açıq şəkildə göstərir.

Aysel Mətləb

TodayPress TV