“Berkan” iddiaları boşa çıxdı: Vozinya Çilidədir
Vozinya “Kolo-Kolo”ya transferini tamamlamaq üçün Çiliyə gəlib.
TodayPress TV xəbər verir ki, bu barədə insayder Fabrizio Romano məlumat yayıb.
Bildirilir ki, Kabo-Verde millisinin 40 yaşlı qapıçısı Vozinya “Kolo-Kolo” klubuna transferini başa çatdırmaq üçün Çiliyə eniş edib.
Daha əvvəl Mərakeşin “Berkan” klubunun Vozinyanı “Kolo-Kolo”nun əlindən aldığı bildirilirdi. Hətta futbolçunun planlarını dəyişdiyi və Mərakeş təmsilçisi ilə keçidin son detallarını müzakirə etdiyi iddia olunurdu.
Bununla belə, qapıçının Çiliyə gəlməsi onun karyerasını məhz “Kolo-Kolo”da davam etdirəcəyini göstərir.
Qeyd edək ki, Vozinya son dünya çempionatında Kabo-Verde millisinin heyətində 4 oyunda meydana çıxıb və bunların ikisində qapısını toxunulmaz saxlayıb.
Onun son klubu Portuqaliyanın II liqa təmsilçisi “Şaviş” olub. Təcrübəli qolkiper ötən mövsüm bütün turnirlərdə 19 matç keçirib, 6 oyunda qapısından qol buraxmayıb.
Transfermarkt portalında futbolçunun bazar dəyəri 500 min avro qiymətləndirilir.
Namiq HUN
