6 Avropa ölkəsindən İsrailə birgə etiraz: Diplomatlar XİN-ə çağırılır
Fransa, Böyük Britaniya, İtaliya, Belçika, İspaniya və Niderland "Qlobal Sumud Flotiliyası" fəallarına qarşı göstərilən pis rəftara görə İsrailə sərt reaksiya verib.
TodayPress TV xəbər verir ki, adı çəkilən ölkələr İsrail diplomatlarını xarici işlər nazirliklərinə çağıraraq izahat tələb ediblər.
Niderland: Baş nazir Rob Yetten fəallarla bu cür rəftarın tamamilə qəbuledilməz olduğunu vurğulayaraq, İsrail səfirinin nazirliyə çağırıldığını bəyan edib.
İtaliya: Baş nazir Corcia Meloni və Xarici İşlər Naziri Antonio Tayani də yayılan görüntülərə çox sərt reaksiya veriblər. Baş nazir Meloni İsrailin fəalları beynəlxalq sularda qanunsuz olaraq saxladığını bildirərək, aralarında çox sayda İtaliya vətəndaşının da olduğu insanlara qarşı edilən bu ləyaqəti alçaldan rəftarın qəbuledilməz olduğunu vurğulayıb.
İtaliyanın izahat və rəsmi üzrxahlıq tələbi ilə İsrail səfirini nazirliyə çağıracağını açıqlayan Meloni, nazir Ben-Qvirin paylaşdığı görüntülərə dözüm nümayiş etdirilməyəcəyini ifadə edib.
İspaniya: İspaniya hökuməti fəallara qarşı tətbiq edilən bu münasibəti "vəhşilik" kimi qiymətləndirib və İsraildən rəsmi üzrxahlıq tələb edib.
Rəsmi Madrid bu məqsədlə İsrailin işlər vəkilini Xarici İşlər Nazirliyinə çağırıb.
Böyük Britaniya: Xarici İşlər Naziri İvet Kuper də etiraz edən liderlərə qoşularaq, İsrailin Milli Təhlükəsizlik Naziri İtamar Ben-Qvirin flotiliya iştirakçılarını ələ saldığı videodan dəhşətə gəldiyini bildirib.
Nazir Kuper bu vəziyyətin insan ləyaqəti və hörmət prinsiplərinin ən fundamental qaydalarını pozduğunu vurğulayaraq, İsrail rəsmilərindən rəsmi izahat tələb etdiklərini bəyan edib.
Belçika: Xarici İşlər Naziri Maksim Prevot insanların əlləri bağlı şəkildə üzüüstü yerə uzadılmasının və hökumət naziri tərəfindən bu alçaldıcı anların sosial şəbəkədə paylaşılmasının fundamental insan ləyaqəti standartlarına zidd olduğunu qeyd edib.
Saxlanılanlar arasında Belçika vətəndaşlarının da olduğunu xatırladan Prevot, bütün fəalların dərhal sərbəst buraxılmasına çağırıb.
Fransa: Xarici İşlər Naziri Jan-Noel Barro nazir Ben-Qvirin hətta İsrail hökumətindəki öz həmkarları tərəfindən belə etirazla qarşılanan bu hərəkətlərini kəskin dillə tənqid edib.
Fransanın qəzəbini çatdırmaq məqsədilə İsrailin Parisdəki səfiri Coşua Zarkanın nazirliyə çağırıldığını elan edən Barro, vətəndaşlarının təhlükəsizliyinin hər zaman birinci prioritet olduğunu vurğulayıb.
Aysel Mətləb
