Tramp Netanyahunun xahişini yerə saldı - Türkiyə ilə bağlı YENİ QƏRARLAR

ABŞ Prezidenti Donald Trampın Ankara sammitində verdiyi mesajlar toplantının əsas gündəminə çevrilib. Tramp çıxışında NATO-dan məyus olduğunu desə də, sammitin Türkiyədə və Prezident Rəcəb Tayyib Ərdoğanın ev sahibliyi ilə keçirilməsinin onun iştirak qərarında həlledici rol oynadığını bildirib. O, Ərdoğanı “çox güclü lider” adlandıraraq Türkiyə ilə münasibətlərə xüsusi önəm verdiyini nümayiş etdirib.

TodayPress TV xəbər verir ki, Trampın ən diqqətçəkən açıqlamalarından biri isə Türkiyəyə qarşı tətbiq edilən sanksiyalarla bağlı olub. ABŞ lideri bu məhdudiyyətlərin aradan qaldırılacağını, Vaşinqtonla Ankara arasında yeni hərbi əməkdaşlıq imkanlarının müzakirə edildiyini açıqlayıb. O, Türkiyənin NATO-nun ən güclü ordularından birinə sahib olduğunu, alyansa bir çox ölkədən daha böyük töhfə verdiyini vurğulayıb. F-35 qırıcılarının satışı ilə bağlı suala cavabında isə bunun mütləq nəzərdən keçiriləcəyini və Türkiyənin ABŞ-nin etibar etdiyi tərəfdaşlardan biri olduğunu deyib.

ABŞ prezidentinin İranla bağlı sözləri də diqqətdən yayınmayıb. Tramp bildirib ki, İranla müharibə dövründə Türkiyə Vaşinqtona bir çox istiqamətdə mühüm dəstək verib və Ankaranın rolu danılmazdır. Bu açıqlama bir çox müşahidəçi tərəfindən İsrailin Baş naziri Benyamin Netanyahunun Türkiyənin ABŞ-yə dəstək vermədiyi barədə son bəyanatına dolayısı cavab kimi qiymətləndirilir.

Ankarada keçirilən sammitin əsas müzakirə mövzuları isə təkcə Türkiyə-ABŞ münasibətləri ilə məhdudlaşmır. Ukraynadakı müharibə, Rusiyaya qarşı yeni addımlar, Çinin artan təsirinə qarşı strategiya, eləcə də Yaxın Şərqdə İran-İsrail qarşıdurmasından sonra formalaşan yeni geosiyasi vəziyyət liderlərin gündəmində əsas yer tutur.

Ekspertlər hesab edirlər ki, bu sammitdə qəbul ediləcək qərarlar təkcə NATO-nun gələcək fəaliyyət istiqamətlərini müəyyənləşdirməyəcək, həm də regionda qüvvələr balansına ciddi təsir göstərəcək. Xüsusilə Ukrayna ilə bağlı gözlənilən qərarlar və Rusiyaya qarşı yeni yanaşmalar Moskvanın diqqətlə izlədiyi əsas məsələlərdən biridir.

Kübra Musayeva