Tramp İranın son təklifini rədd etdi: Hörmüz boğazı üzrə danışıqlarda böhran
ABŞ Prezidenti Donald Tramp İranın bu həftə Nyu-Yorkda vasitəçilər üzərindən Vaşinqtona çatdırdığı son təklifi rədd etdiyini açıqlayıb.
TodayPress TV xəbər verir ki, bu barədə "Axios" məlumat yayıb.
“Onlar təklif verdilər və mən onu rədd etdim”, – Tramp bildirib.
Buna baxmayaraq, ABŞ rəsmiləri Vaşinqtonla Tehran arasında vasitəçilərin iştirakı ilə danışıqların davam etdiyini və nüvə məsələsi üzrə müzakirələrin “müsbət və konstruktiv” olduğunu bildirirlər.
İranın şərti nədir?
İranın xarici işlər naziri Abbas Əraqçinin ABŞ nümayəndələri Stiv Uitkoff və Cared Kuşnerə təqdim etdiyi təklifə görə, Tehran Hörmüz boğazının açılması və nüvə danışıqlarının bərpasını müzakirə etməyə hazırdır.
Bunun qarşılığında İran ABŞ-dən dəniz blokadasının və neft ixracına tətbiq edilən sanksiyaların aradan qaldırılmasını, həmçinin regionda atəşkəsin bərpasını tələb edir.
ABŞ tərəfi isə əsas diqqəti İranın nüvə proqramı ilə bağlı güzəştlərinə yönəldir. Vaşinqton danışıqlar zamanı Tehrana Hörmüz boğazına nəzarət etmədiyini və buna görə də boğazla bağlı şərtlər irəli sürə bilməyəcəyini bildirib.
Hörmüzdə neft axını davam edir
Bununla belə, boğazdan neft daşımaları tam dayanmayıb. ABŞ rəsmilərinin məlumatına görə, son 72 saat ərzində Hörmüz boğazından təxminən 60 milyon barel neft daşınıb.
Hazırkı vəziyyətdə əsas fikir ayrılığı dəyişməz olaraq qalır: İran əvvəlcə blokada və sanksiyaların aradan qaldırılmasını, ABŞ isə nüvə məsələsində konkret güzəştləri tələb edir.
Türkan İsgəndərli
