Avstraliyada başlayan eşq nağılı, Pakistanda kabusa çevrildi – Fransız xanım necə qul edildi?

Fransa vətəndaşı Silviya Yasminanın həyat hekayəsi son günlər sosial şəbəkələrdə geniş rezonans doğurub. Buna səbəb onun evlilikdən əvvəl və sonrakı fotolarının yayılması, eləcə də 12 il ərzində həyat yoldaşı tərəfindən təcrid olunmuş şəraitdə saxlanılması ilə bağlı faktların üzə çıxması olub.

TodayPress TV xəbər verir ki, BBC-nin məlumatına görə, hadisə Pakistan polisinin 54 yaşlı qadını və onun beş övladını xilas etməsindən sonra ictimaiyyətə məlum olub.

Polis Hayber-Paxtunxva əyalətinin Bar yaşayış məntəqəsində keçirdiyi əməliyyat zamanı palçıqdan tikilmiş evdə saxlanılan Silviya Yasmina və övladlarını azad edib.

Araşdırma nəticəsində müəyyən edilib ki, Silviya Yasmina 2003-cü ildə pakistanlı Əhməd Xanla ailə qurub. Cütlük evləndikdən sonra bir müddət Avstraliyada yaşayıb.

2014-cü ildə ailə iki övladı ilə birlikdə Pakistana köçüb. Bundan sonra Əhməd Xan həyat yoldaşını evdə qapalı şəraitdə saxlayaraq onun xarici dünya ilə bütün əlaqələrini kəsib. Qadının uzun illər məişət zorakılığına məruz qaldığı bildirilir.

Silviya Yasmina Pakistanda daha üç uşaq dünyaya gətirib. Məlumata görə, beş uşağın hamısı ciddi nəzarət altında təcrid olunmuş şəraitdə saxlanılıb və onların məktəbə getməsinə icazə verilməyib.

Ailənin xilas olunması uşaqlardan birinin gizli şəkildə evdən qaçaraq Bar şəhərindəki polis bölməsinə müraciət etməsi sayəsində mümkün olub. O, polisə anasının və bacı-qardaşlarının vəziyyəti barədə məlumat verib.

Bundan sonra keçirilən əməliyyat nəticəsində Əhməd Xan saxlanılıb. Silviya Yasmina və övladları təhlükəsizliklərinin təmin olunması və lazımi dəstəyin göstərilməsi üçün polis nəzarətinə götürülüb. Fransa vətəndaşı olan qadının vətəninə qayıtmaq istəyi nəzərə alınaraq onun repatriasiya prosesi başladılıb.

Qiymət Mahir