UNESCO-dan bəşəriyyətə ərmağan: Dünya Türk Dili Ailəsi Günü təsis edildi!

“UNESCO-nun Səmərqənddə keçirilən 43-cü konfransında qəbul edilən Dünya Türk Dilləri Ailəsi Günü türk dünyasını birləşdirən əsas bayramlardan birinə çevriləcək”.

Türk dünyası məsələləri üzrə ekspert İlqar İlkin bunu TodayPress TV-yə açıqlamasında bildirib.

O qeyd edib ki, bu günün qeyd olunması üçün 15 dekabr tarixinin seçilməsi təsadüfi deyil:

“Məhz həmin gün bütün türklərin ilk yazısı və əlifbası olan Orxon–Yenisey əlifbasının şifrəsi açılıb və bu əlifba elmi şəkildə üzə çıxarılıb. Buna görə də günün seçimi simvolik və olduqca önəmlidir.

Bu qərar bütün türk xalqlarına öz qədim yazı mədəniyyətlərinə diqqət yetirmək imkanı yaradır. Orxon–Yenisey əlifbası artıq bəzi universitetlərdə öyrədilir. Növbəti mərhələdə bu mövzuya orta məktəb proqramlarında da ayrıca yer ayrılmalı, Orxon–Yenisey abidələrinin yazıları ayrıca fənn kimi tədris edilməlidir. Çünki bu, bütün türk xalqlarını birləşdirən ortaq yazı mədəniyyətinin əsas göstəricisidir.

Həmçinin türk dilləri BMT-nin altı rəsmi dili sırasına daxil deyil. Çalışmalıyıq ki, türk dilləri BMT-nin rəsmi dilləri arasında yer alsın. Çox vaxt türk dili arxa planda qalır. Biz ortaq türkcəmizi inkişaf etdirib vahid türk dilini formalaşdırmalı, UNESCO-da tanınan bu təşəbbüsü BMT səviyyəsində də rəsmiləşdirməliyik. Bu həm ortaq tariximizin, həm də ortaq kimliyimizin canlandırılması baxımından mühüm addım olacaq”.

İlqar İlkin əlavə edib ki, bu qərar təkcə müstəqil türk dövlətlərini deyil, Rusiya və digər ölkələrdə yaşayan türk mənşəli etnik qrupları da əhatə edir. Onların mədəniyyətinə və problemlərinə beynəlxalq diqqətin artırılması baxımından bu addım xüsusi əhəmiyyət daşıyır.

Ekspert sonda bu günün əsl bayram kimi qeyd olunmalı olduğunu vurğulayıb:

“Dünya Türk Dilləri Ailəsi Günü gələcəkdə türk dünyasını birləşdirən əsas bayramlardan birinə çevriləcək. Bu günü geniş miqyasda, həqiqi bayram ab-havasında və davamlı şəkildə qeyd etmək lazımdır”.

Qeyd edək ki, noyabrın 3-də Türkiyənin mədəniyyət və turizm naziri Mehmet Nuri Ersoy sosial media hesabında 15 dekabr tarixinin UNESCO tərəfindən Dünya Türk Dili Ailəsi Günü elan edildiyini açıqlayıb.

Nazir bildirib ki, Özbəkistanın Səmərqənd şəhərində keçirilən UNESCO-nun 43-cü Baş Konfransında qəbul edilən qərar Türkiyənin qardaş türk dövlətləri ilə birlikdə hazırladığı və 26 ölkənin birgə təqdim etdiyi ortaq təşəbbüsdür.

“Türk dillərinin tanıdılmasını artıran bu tarixi addım ortaq yaddaşımız olan türk dilinin qorunması və gələcək nəsillərə ötürülməsi istiqamətində beynəlxalq əməkdaşlığı daha da gücləndirəcək. Əməyi keçən hər kəsi təbrik edirəm. 15 dekabr Dünya Türk Dili Ailəsi Günü bütün bəşəriyyətə ərməğan olsun”, – deyə Ersoy qeyd edib.

Qiymət Mahir