25 ildən sonra Ağ Evin QAPISI AÇILDI: “Görüş uğurlu nəticələnərsə…”

ABŞ Prezidenti Donald Tramp noyabrın 10-da Ağ Evdə Suriya Prezidenti Əhməd Əl Şaraa ilə görüşəcək. Bu, Suriya liderinin Ağ Evə ilk səfəri olacaq. 

Ağ Evin sözçüsü Karoline Leavitt deyib ki, bu görüş prezidentin sülhə nail olmaq üçün bütün dünyada hər kəslə görüşmək üçün diplomatik səylərinin bir hissəsidir. 

Politoloq Fəqani Məhərrəmli planlaşdırılan görüşü TodayPress TV-yə şərh edib.

Onun sözlərinə görə, bu səfər bir sıra aspektlərdən mühüm tarixi hadisə kimi qiymətləndirilməlidir:

“Əhməd Əl Şaraa Ağ Evdə ABŞ Prezidenti ilə görüşən ilk Suriya lideri kimi tarixə düşəcək. Görüşün Yaxın Şərqdə hərbi-siyasi gərginliyin ən yüksək həddə çatdığı bir dövrdə baş tutması isə bu səfərin əhəmiyyətini daha da artırır. Suriya coğrafi mövqeyinə və tarixi roluna görə, İraq, Livan və Fələstinlə yanaşı, regionun ən strateji ölkələrindən biridir. 8 dekabr inqilabı və 61 illik BƏƏS rejiminin devrilməsi isə ölkəyə yeni imkanlar qazandırıb. Buna görə də Suriya Prezidentinin ABŞ səfəri uzun illər ərzində yığılıb qalmış bir çox məsələlərin həllini zəruri edir”.

Politoloq bildirib ki, Ağ Evdə keçiriləcək görüşdə Suriyanın və bütövlükdə regionun gələcəyi ilə bağlı fikir mübadiləsi aparılacağı gözlənilir:

“Suriyada fəaliyyət göstərən PYD/YPG terror təşkilatının durumu, ölkənin cənubunda yaşayan dürzilərin problemləri, İsrail–Qəzza münaqişəsində Suriyanın mövqeyi, eləcə də enerji məsələləri müzakirə olunacaq. Bu görüş uğurlu nəticələnərsə, Suriyanın bütövlüyü və müstəqilliyinin qorunması baxımından çox mühüm tarixi nailiyyət olacaq”.

Qeyd edək ki, Tramp may ayında Səudiyyə Ərəbistanında Əhməd Əl Şara ilə görüşərək son 25 il ərzində Suriya lideri ilə danışıqlar aparan ilk ABŞ prezidenti olmuşdu. Həmin görüşdən sonra Tramp Suriyanı İsraillə münasibətləri normallaşdırmağa çağırmış və Əhməd Əl Şaranı “güclü keçmişi və döyüş ruhu”na görə tərifləmişdi.

Qiymət Mahir