"Pis" xolesterol səviyyəsini azaldan maddə aşkarlandı

Şərbətciotunun tərkibində olan birləşmələr bədəndə yağ metabolizmasını yaxşılaşdıra, triqliseridləri və “pis” xolesterolu (LDL) azalda, eyni zamanda isə “yaxşı” xolesterolu (HDL) artıra bilər.

TodayPress TV  xəbər verir ki, bu barədə "Gazeta.ru"da tədqiqat məqaləsi dərc olunub.

Sözügedən  nəticəyə "Rzeszow" Universitetinin tədqiqatçıları gəliblər. Tədqiqatın nəticələri "Nutrients" jurnalında dərc edilib.

Alimlər qeyd edirlər ki, şərbətçiotu (Humulus lupulus L.) əsasən pivənin tərkib hissəsi kimi tanınsa da, onun tərkibində maddələr mübadiləsinə və NF-κB, Nrf2, AMPK, MAPK, PPAR və PI3K/AKT/mTOR kimi siqnal yollarına təsir göstərə bilən bir sıra bioloji aktiv maddələr mövcuddur. Bu maddələr qanda dövr edən yağlı birləşmələr – triqliseridlərin və aşağı sıxlıqlı lipoproteinlərin (LDL) konsentrasiyasını azalda bilər. 

Müəlliflərin sözlərinə görə, bu təsirlər yağ emalında və enerji balansının tənzimlənməsində iştirak edən ferment və reseptorlara təsirlə əlaqədardır. Şerbetçiotunun bəzi komponentləri həmçinin iltihabı və oksidləşdirici stresi azalda bilər. Oksidləşdirici stress zamanı reaktiv oksigen növləri hüceyrələrdə toplanaraq toxuma zədələnməsinə səbəb olur.

Bundan əlavə, bir neçə təcrübə insulinə həssaslığın yaxşılaşdığını göstərib. Bu isə o deməkdir ki, bədənin hüceyrələri insulin hormonuna daha yaxşı reaksiya verir və qandakı qlükozanı daha səmərəli şəkildə istifadə edir. Bu mexanizmin pozulması isə 2-ci tip diabetin inkişafında əsas amillərdən biri hesab olunur. Tədqiqatlarda həmçinin düzgün qidalanma pozulduqda belə, yağ yığılmasının azaldığı müşahidə edilib.

Müəlliflər vurğulayırlar ki, indiyədək aparılmış tədqiqatların əksəriyyəti laboratoriya sınaqları və kiçik klinik müşahidələrdən ibarətdir. Real şəraitdə şerbetçiotunun effektivliyi istifadə dozasından, tətbiq üsulundan və fərdi xüsusiyyətlərdən asılı ola bilər. Bununla belə, mövcud məlumatlar göstərir ki, bu bitki metabolik sağlamlığı dəstəkləmək üçün potensial təbii komponent ola bilər.

Jalə Rövşən 

TodayPress TV