"Hər ölkə bu vaksini istehsal edə bilməz" - AÇIQLAMA

Xərçəng xəstəliyi son dövrlərin əsas problemlərindən biridir. Təəssüf ki, müalicə üsullarında əhəmiyyətli irəliləyişlərə baxmayaraq, xəstəlik gec aşkar edildikdə, xəstələrin 5 illik sağ qalma nisbəti 40% -dən çox deyil. Bununla yanaşı xərclərin çox olması da müalicə edilməsində çətinliklər yaradır.

Həkim-terapevt Etibar Süleymanov TodayPress TV-yə açıqlamasında bildirib ki, ölkəmizdə İcbari tibbi sığorta sistemində dərmanlar və peyvəndlər təsdiqlənərsə, həmin dərmanlar artıq müvafiq yoxlamalardan keçmiş hesab olunur.

"Bununla belə, onların real effektivliyini yalnız tətbiq olunduqdan sonra müşahidə etmək mümkündür. Yəni peyvəndlərin istifadə edildiyi bölgələrdə nəticələrə baxaraq onların təsir gücünü və səviyyəsini qiymətləndirmək olar". 

Həkim əlavə edib ki, preparatların keyfiyyəti barədə qəti nəticəyə gəlmək üçün Səhiyyə Nazirliyi və TƏBİB-in laboratoriyalarında aparılan müstəqil yoxlamaların nəticələri əsas götürülməlidir:

"Keyfiyyəti barədə də qəti fikir söyləmək üçün laborator yoxlamaların nəticələrinə əsaslanmaq lazımdır. Bu cür yoxlamaları isə Səhiyyə Nazirliyi və ya TƏBİB-in müvafiq laboratoriyaları həyata keçirir. Buna görə də, hazırda bu peyvəndlər haqqında konkret və yekun fikir bildirmək çətindir".

Mütəxəssis həmçinin peyvənd istehsalının çətinliyinə toxunub və vurğulayıb ki, bu proses hər ölkənin bacardığı iş deyil:

"Ümumiyyətlə, belə vaksinlərin istehsalı hər ölkənin bacardığı bir proses deyil. Bu, yüksək texnologiya, dəqiq avadanlıqlar və xüsusi elmi yanaşma tələb etdiyinə görə yalnız müəyyən inkişaf etmiş ölkələr tərəfindən həyata keçirilir". 

Qeyd edək ki, Rusiyada hazırlanan xərçəng peyvəndləri ilə müalicə artıq icbari tibbi sığorta çərçivəsində pulsuz təmin ediləcək. Bu peyvəndlər əsasən fərdiləşdirilir və immun sistemini şişlərlə mübarizə aparmağa öyrətmək məqsədilə hər bir xəstəyə uyğun şəkildə hazırlanır.

Ölkəmizdə xərçəng xəstələri üçün bu xidmət aktiv deyil.

Türkan İsgəndərli

TodayPress TV