Bağırsaq mikrobiomu idrak geriləməsini yavaşladır

Beynəlxalq tədqiqatçılar qrupu bağırsaq mikrobiomunda dəyişikliklərin yaşlı insanlarda idrak geriləməsini yavaşlada biləcəyini müəyyən edib.

TodayPress TV xəbər verir ki, araşdırma "Nutrition Research" jurnalında dərc olunub.

2012–2025-ci illəri əhatə edən 15 tədqiqatın təhlilində 45 yaşdan yuxarı 4275 nəfərin məlumatları araşdırılıb. İştirakçılar arasında demensiya, yüngül koqnitiv pozğunluq və ya bu xəstəliklərin yüksək riski olan şəxslər yer alıb.

Tədqiqatlarda bağırsaq mikrobiotasını dəyişmək üçün müxtəlif üsullar – pəhrizlər, probiotiklər, prebiotiklər və mikrobiota transplantasiyası tətbiq olunub. Nəticədə iştirakçılarda bağırsaq bakteriyalarının müxtəlifliyi artıb və bu, yaddaş, icra funksiyası və ümumi idrak qabiliyyətinin yaxşılaşması ilə əlaqələndirilib.

Ən güclü təsir Alzheimer xəstəliyinin erkən mərhələsində müşahidə olunub, irəliləmiş mərhələlərdə isə təsir daha məhdud olub.

Alimlər bu müsbət nəticələri iltihabəleyhinə və neyroprotektiv xüsusiyyətlərə malik bakterial maddələrlə əlaqələndirirlər. Xüsusilə diqqət çəkən üsullardan biri bağırsaq mikrobiotasının transplantasiyası olsa da, bu metod hələ eksperimental sayılır və tam öyrənilməyib.

Daha əlçatan yanaşmalar, xüsusilə Aralıq dənizi pəhrizi daha sabit nəticələr göstərib. Bu pəhriz zeytun yağı və qoz-fındıqla birlikdə daha yaxşı idrak funksiyası ilə əlaqələndirilib. Eyni zamanda, probiotik və prebiotiklərin də yaddaş və dil bacarıqlarını yaxşılaşdıra biləcəyi müəyyən olunub.

Tədqiqat müəllifləri nəticələrin hələ ilkin olduğunu vurğulasa da, bu tapıntılar bağırsaq-beyin əlaqəsinin mühüm rolunu göstərir və gələcəkdə demensiyanın qarşısının alınması üçün yeni yanaşmaların inkişafına ümid yaradır.

Türkan İsgəndərli

TodayPress TV