“Tramp klassik “pis polis – yaxşı polis” taktikasını davam etdirir...”

“ABŞ prezidenti Donald Trampın G7-dəki çıxışları və Rusiyanı geri qaytarmaq cəhdləri sadəcə piar məqsədli oyundur”.

Politoloq Tofiq Abbasov bunu TodayPress TV-yə danışarkən deyib. 

Onun sözlərinə görə, Trampın Rusiya ilə bağlı verdiyi açıqlamalar və “Böyük Yeddiliyə” (G7) dair səsləndirdiyi fikirlər əsasən siyasi manipulyasiya hesab olunmalıdır.  

"Tramp klassik “pis polis – yaxşı polis” taktikasını tətbiq edir və hazırda G7-nin daxilində “yaxşı polis” rolunu oynamağa çalışır. Bu isə yalnız ictimai rəyi yönləndirmək və psixoloji üstünlük əldə etmək məqsədinə xidmət edir. Ancaq G7-də Rusiya ilə bağlı ümumi rəğbətsizlik hökm sürür və heç bir üzv ölkənin Kremlin siyasətinə müsbət münasibəti yoxdur. Rusiya guya G7-yə geri qaytarılacaq. Bəs o zaman Rusiya ölkəsini "işğalçı" adlandıran dövlətlərlə necə eyni masada oturacaq? Birləşmiş Ştatların bir sözündən sonra hamı Rusiya ilə dost olacaq? Əlbəttə ki, yox”, - deyə o bildirib. 

Analitik, həmçinin Trampın davranışlarında davamlı ziddiyyətlər və qeyri-ciddiliyin hökm sürdüyünü də dilə gətirib. Belə ki, Tramp reallıqdan uzaq, nəticəsiz və təmtəraqlı açıqlamalar verməklə özünü gündəmdə saxlayır, lakin bu ritorikanın arxasında effektiv siyasi nəticə yoxdur. ABŞ daxilində də onun reytinqi getdikcə aşağı düşür və bu, qeyri-adi idarəçilik tərzinin nəticəsidir.

"Trampın dövlət siyasəti hələ də formalaşmayıb, əsasən eksperimentlər və sınaqlar üzərində qurulub. Bu gün Tramp güclü deyil, əksinə, yararsız siyasətin təmsilçisinə çevrilib. Belə olan halda Rusiyanın G7-yə qaytarılması ehtimalı real görünmür, xüsusən də Ukrayna müharibəsi bitənə qədər".

Politoloqun fikrincə, hazırda Avropanın aparıcı paytaxtları – Paris, London və Berlin Rusiyanı zəiflətmək üçün səylərini birləşdiriblər və bu şəraitdə Trampın Rusiya ilə “mehribanlıq” mesajları inandırıcı görünmür. Tramp bu oyunla yalnız özünə nəsə qazandırmağa çalışır, amma Rusiyanın buradan real mənfəət əldə edəcəyinə inanmaq sadəlövhlük olar.

Qeyd edək ki, ABŞ prezidenti Donald Tramp mətbuat konfransı zamanı çıxış edərək Rusiyanın G8-dən çıxarılmasını səhv addım adlandırıb. O bildirib ki, Rusiya G8-də olsaydı, hərbi əməliyyatlara başlamazdı. 

Töhfə Səməd