Qətər nümayəndəsi: “Uşaqların onlayn təhlükəsizliyi ortaq məsuliyyətdir”

“Uşaqların internetdə qorunması fərdin, cəmiyyətin və dövlətin birgə öhdəliyidir”.

TodayPress TV xəbər verir ki, bunu Qətər Dövlətinin Sosial İnkişaf və Ailə Nazirliyinin Ailə Məsələləri üzrə köməkçi müavini Şeyxa Şaika bint Cassim Al Tani “Rəqəmsal mühitdə uşaqların müdafiəsi: Müasir alətlər və beynəlxalq əməkdaşlıq konfransı”nda çıxışı zamanı deyib.

O bildirib ki, Qətər Dövləti uşaqların qorunmasını və onların internetdə təhlükəsizliyinin təmin edilməsini fərdin, cəmiyyətin və dövlətin birgə məsuliyyəti kimi qiymətləndirir. Bu məqsədlə internet istifadəçilərini, xüsusilə də uşaqları mövcud risklərdən qorumaq üçün bir sıra institusional və hüquqi tədbirlər həyata keçirilib. Bunlara kibercinayətkarlıqla mübarizə mərkəzlərinin yaradılması, müvafiq qanunvericiliyin gücləndirilməsi və uşaqların, eləcə də yeniyetmələrin internetdən istifadə zamanı təhlükəsizlik və məxfilik qaydalarını anlamasına xidmət edən “Safe Space” platformasının istifadəyə verilməsi daxildir.

Şeyxa Şaika bint Cassim Al Tani vurğulayıb ki, Qətər qanunvericiliyi İslam şəriətinin prinsiplərinə, eyni zamanda cəmiyyətdə dərin kök salmış milli və mənəvi dəyərlərə əsaslanaraq uşaq və ailə institutuna xüsusi önəm verir. Onun sözlərinə görə, Qətər Konstitusiyasında ailənin cəmiyyətin təməli olduğu təsbit edilir və uşağın istismar və laqeydlikdən qorunması dövlətin konstitusion vəzifəsi kimi müəyyən olunub.

O əlavə edib ki, ailə qanunvericiliyi və rəqəmsal mühitlə bağlı cinayət qanunları uşaqların və ailənin müdafiəsini detallı şəkildə tənzimləyir. Buna misal olaraq, 2014-cü il tarixli 14 saylı Elektron Cinayətlər haqqında Qanunun internet üzərindən uşaqlara qarşı törədilən istismar və laqeydlik hallarına görə cəza tədbirləri nəzərdə tutduğunu qeyd edib. Həmçinin 2016-cı il tarixli 13 saylı Şəxsi Məlumatların və Məxfiliyin Qorunması haqqında Qanunun valideynin razılığı olmadan uşaqlara dair məlumatların toplanmasını qadağan etdiyini diqqətə çatdırıb.

Qətər nümayəndəsi bildirib ki, bu qanunvericilik aktlarında uşaqların texnologiyadan mənfi istifadə nəticəsində yarana biləcək bütün risklərdən qorunmasını təmin edən aydın və konkret hüquqi normalar əksini tapıb.

Qiymət Mahir

TodayPress TV