Vəziyyət gərginləşir: Ter-Petrosyan II Qareginin cəbhəsinə keçdi

“Ermənistanın Baş naziri Nikol Paşinyanın keçmiş prezident Levon Ter-Petrosyanın II Qareginlə görüşünə bu cür sərt reaksiya verməsi, əslində, başa düşüləndir. Çünki Paşinyan özü zamanında Ter-Petrosyanın mövqeyini müdafiə edib”.  

Politoloq Rəşad Bayramov bunu TodayPress TV-yə danışarkən deyib. 

O qeyd edib ki, Paşinyan hakimiyyət uğrunda mübarizə aparanda, açıq şəkildə olmasa da, Ter-Petrosyan tərəfindən ona dəstək verilməsi ilə bağlı məlumatlar mövcuddur: 

“Belə olan halda, indi Ter-Petrosyanın Paşinyanın müxalifəti qismində çıxış edən kilsənin mövqeyini müdafiə etməsi, təbii ki, Paşinyan tərəfindən sərt reaksiya ilə qarşılandı. Bu görüş Paşinyana olduqca mənfi təsir göstərib. Məsələ burasındadır ki, hazırda Ermənistanda növbəti parlament seçkilərinə hazırlıq gedir və Paşinyan da bu seçkilərdə təkcə ənənəvi müxalifət olan Serj Sarkisyan-Robert Köçəryan cütlüyünə qarşı deyil, həm də həmin qüvvələrə dəstəyini ifadə edən kilsəyə qarşı mübarizə aparmaq məcburiyyətindədir. İndi Levon Ter-Petrosyanın da həmin düşərgədə olması və onlarla eyni mövqedən çıxış etməsi Paşinyana qarşı böyük bir qüvvənin təmərküzləşməsini göstərir”.  

Analitikin sözlərinə görə, Paşinyan seçkilərə az vaxt qaldığı dövrdə maksimum şəkildə müxalifətin mövqelərinin zəiflədilməsi üçün müvafiq addımlar atmağı hədəfləyir: 

“Ənənəvi Paşinyan müxalifətinin ictimai dəstəyinin zəif olması bir həqiqətdir, amma o da həqiqətdir ki, Ermənistanda kilsənin ictimai rəyə təsir imkanı olduqca böyükdür. İndiyə qədər, istər Baqrat Qalstanyanın, istərsə də II Qareginin çağırışları fonunda Paşinyana qarşı geniş kütlələri səfərbər etmək mümkün olmasa da, onların siyasi müxalifətlə birgə addımları, təbii ki, növbəti seçkilərdə Paşinyan üçün baş ağrısına çevrilə bilər. Ona görə Paşinyan indi maksimum şəkildə qüvvələrini səfərbər edərək kilsəni neytrallaşdırmaq və növbəti mərhələdə onların müxalifətə olan dəstəyini kəsməyi hədəfləyir. Buna nə dərəcədə müvəffəq olacağını zaman göstərəcək, amma indiki halda görünən ondan ibarətdir ki, bu qüvvələrin birgə mübarizəsi belə Paşinyanın hakimiyyəti üçün düşünüldüyü qədər də ciddi təhlükə yaratmır. Təbii ki, siyasi qüvvə ilə kilsə birliyi, Rusiyanın təzyiqləri, Rusiyanın həm kilsəyə, həm də siyasi müxalifətə təsir imkanları qarşıdakı dönəmdə Paşinyan üçün problemlər yaradacaq, amma hələlik Paşinyan daha üstün mövqedədir. Bu mövqeyindən maksimum şəkildə istifadə edərək növbəti seçkilərdə daha rahat qalib gələ bilmək üçün ən vacib olan şeyi - kilsəni neytrallaşdırmağı qarşısına hədəf qoyub və bu istiqamətdə də fəaliyyətini davam etdirir”. 

Qeyd edək ki, Ermənistanın Baş naziri Nikol Paşinyan bildirib ki, Levon Ter-Petrosyan Ermənistan Respublikasında seçki saxtakarlığı praktikasının banisidir və o, təbii ki, özü kimi populist və fırıldaqçının yanında olmalıdır. O, bu sözləri Levon Ter-Petrosyanın II Qareginlə görüşməsi və ona “tam dəstək” ifadə etməsinin ardından sosial şəbəkə hesabında yazıb. 

Qiymət Mahir