Belə avtomobilləri almayın - Servisi yoxdur

"Azərbaycanda elektrik enerjisi ilə işləyən avtomobillər üçün infrastruktur yetərincə inkişaf etməyib".

Bunu TodayPress TV-yə açıqlamasında nəqliyyat eksperti Eldəniz Cəfərov bildirib.

Onun sözlərinə görə, hazırda ölkə üzrə enerji doldurma məntəqələrinin sayı kifayət qədər deyil və mövcud stansiyalar əsasən Bakı və ətraf ərazilərdə cəmləşib. Regionlarda isə demək olar ki, bu tip məntəqələr yoxdur:

"Enerji doldurma infrastrukturu əsasən paytaxt və yaxın ərazilərlə məhdudlaşır. Regionlarda bu imkanların olmaması elektromobil sahiblərinin uzun məsafəli səfərlərini ciddi şəkildə çətinləşdirir və bu da insanları bu nəqliyyat növündən çəkindirir".

Ekspertin fikrincə, elektromobillərə marağın azalmasına təsir edən digər mühüm amil bu avtomobillərin təmiri və texniki baxışı ilə məşğul olan ixtisaslaşmış servis mərkəzlərinin azlığıdır. Elektromobillər ənənəvi daxiliyanma mühərrikli avtomobillərlə müqayisədə daha xüsusi yanaşma tələb edir:

"Elektromobillərin təmiri üçün xüsusi bilik, avadanlıq və sertifikatlaşdırılmış ustalar lazımdır. Bu sahədə kadr çatışmazlığı və servis şəbəkəsinin məhdudluğu sürücülərdə risk və narahatlıq yaradır. Nasazlıq baş verdikdə ehtiyat hissələrinin tapılması da çətin və baha olur. Elektromobillərin akkumulyatorları ilə bağlı məsələlər də potensial alıcılar üçün ciddi problem yaradır. Xüsusilə zəmanət müddəti bitdikdən sonra batareyanın dəyişdirilməsi və ya təmiri yüksək maliyyə xərci tələb edir. Akkumulyator elektromobilin ən bahalı hissəsidir. Zəmanət bitdikdən sonra bu hissə ilə bağlı yaranan problemlər avtomobil sahibləri üçün ağır maliyyə yükünə çevrilə bilər. Bu amil də insanların elektromobil almaq qərarına mənfi təsir göstərir".

Eldəniz Cəfərov hesab edir ki, elektromobillərin Azərbaycanda yenidən cəlbedici olması üçün ilk növbədə regionlarda enerji doldurma məntəqələrinin artırılması, ixtisaslaşmış servis mərkəzlərinin yaradılması və bu sahədə kadr hazırlığının gücləndirilməsi vacibdir. Əks halda elektromobillərə marağın azalması tendensiyası davam edə bilər.

Qeyd edək ki, ölkəmizə bu ilin 10 ayı ərzində 1 732 ədəd elektrik mühərrikli nəqliyyat vasitəsi idxal olunub. Bu da ötən ilin eyni dövrü ilə müqayisədə müvafiq olaraq 50 faiz və 33.2 faiz azalma deməkdir.

Türkan İsgəndərli

TodayPress TV