Bazar günü parklanma pulsuzdur, bəs niyə sürücülərdən pul yığılır?
Bakıda və digər şəhərlərdə parklanma ilə bağlı sürücülərin ən çox qarşılaşdığı problemlərdən biri həftə sonları və ya rəsmi olaraq ödənişsiz saatlarda bəzi şəxslərin yenə də sürücülərdən pul tələb etməsidir. Halbuki bir çox ərazilərdə şənbə-bazar günləri və müəyyən saat aralıqlarında parklanma ödənişsiz olur.
Mövzu ilə bağlı TodayPress TV-yə danışan nəqliyyat eksperti Adil Nəbiyev bildirib ki, Buna baxmayaraq bəzi hallarda özünü “nəzarətçi” kimi təqdim edən şəxslər sürücülərdən qanunsuz şəkildə ödəniş almağa çalışırlar.
Onun sözlərinə görə, belə vəziyyətdə sürücü ilk növbədə bilməlidir ki, rəsmi ödəniş yalnız elektron sistem üzərindən həyata keçirilir və heç bir şəxsin əlbəəl pul tələb etmək hüququ yoxdur:
"Əgər həmin vaxt parklanma ödənişsizdirsə, ümumiyyətlə heç kim sürücüdən hər hansı məbləğ tələb edə bilməz. Sürücü belə hallarda sakit və təmkinli davranmalıdır. Əgər şəxs pul tələb edirsə, ilk olaraq həmin ərazidəki parklanma qaydalarına diqqət yetirmək lazımdır. Çünki parklanma zonalarında adətən iş rejimi və ödəniş saatları göstərilir. Əgər həqiqətən həftə sonu və ya pulsuz vaxtdırsa, sürücü heç bir ödəniş etmədən avtomobilini saxlaya bilər. Bu zaman əlavə mübahisəyə girmək və ya aqressiv davranmaq düzgün deyil. Sadəcə rəsmi qaydanı bildiyini və ödənişin tətbiq olunmadığını bildirmək kifayətdir".
Ekspertin vurğulayıb ki, ən vacib məqamlardan biri də budur ki, sürücülər qanunsuz ödəniş tələb edən şəxslərə könüllü şəkildə pul verməklə bu sistemin davam etməsinə şərait yaradırlar:
"Bir çox hallarda insanlar problem yaşamamaq və ya avtomobilinə zərər gəlməsindən ehtiyat etdikləri üçün məcbur qalıb pul ödəyirlər. Amma bu yanaşma həmin şəxslərin fəaliyyətini daha da artırır. Əgər sürücülər hüquqlarını bilsələr və yalnız rəsmi sistemə uyğun hərəkət etsələr, belə halların qarşısını almaq daha asan olar. Əgər sürücü təzyiq, hədə-qorxu və ya israrlı pul tələbi ilə qarşılaşarsa, həmin şəxsin görüntüsünü və ya hadisəni qeydə almaq, daha sonra aidiyyəti qurumlara məlumat vermək düzgün addım olar. Çünki şəhər daxilində parklanma sistemi artıq rəqəmsal qaydada idarə olunur və küçədə dayanıb sürücüdən nağd pul tələb etmək əksər hallarda qanunsuz hesab edilir".
Adil Nəbiyev qeyd edib ki, bu məsələdə həm sürücülərin məlumatlı olması, həm də nəzarətin gücləndirilməsi çox vacibdir.
Türkan İsgəndərli
