Avropada cinayətkar qrup ifşa olundu
İspaniya Milli Polisi danışılmış tennis matçları təşkili edən cinayətkar qrupun fəaliyyətinə son qoymaq məqsədilə beynəlxalq əməliyyat keçirib.
TodayPress TV xəbər verir ki, bu barədə İspaniya hüquq-mühafizə orqanları məlumat yayıb.
Bildirilir ki, əməliyyat Avropa Ədliyyə Orqanlarının Əməkdaşlıq Agentliyinin koordinasiyası ilə və Bolqarıstan, Rumıniya, Fransa hakimiyyət orqanlarının iştirakı ilə həyata keçirilib. Əməliyyat nəticəsində 16 nəfər saxlanılıb. Şübhəlilər 2018-2024-cü illər arasında matçların nəticələrinə təsir edərək, öz müştərilərinə qazanc təmin ediblər. Dələduzlar tennisçilərə seti və ya matçı qəsdən uduzmaq üçün pul ödəyiblər.
Qeyd edək ki, danışılmış oyunlardan əldə edilən gəlirin həcmi 800 min avronu üstələyib.
Namiq HUN
