Paşinyan əsəbiləşdi: "özünü ələ almağı" əmr etdi
Məlum olduğu kimi, Ermənistanın Baş naziri Nikol Paşinyan iyunun 1-də Rusiya Prezidenti Vladimir Putinlə telefon danışığı aparıb.
TodayPress TV xəbər verir ki, rəsmi açıqlamada tərəflər arasında səmimi və konstruktiv dialoqdan bəhs olunsa da, hökumətə yaxın mənbələrin iddiasına görə, Paşinyan danışıqdan sonra narazı qalıb.
Mənbələrin bildirdiyinə görə, Putin söhbət zamanı Paşinyanı ad günü münasibətilə təbrik edib və nəzakətli üslub nümayiş etdirib. Lakin Avrasiya İqtisadi Birliyi (AİB) ilə Avropa İttifaqı (Aİ) arasında seçim məsələsi müzakirə olunarkən Rusiya liderinin daha əvvəl Astanada səsləndirdiyi diplomatik, lakin sərt mövqeyi bir daha diqqətə çatdırdığı iddia edilir.
Məlumata görə, söhbətdən sonra Paşinyan iqtisadiyyat naziri ilə vəziyyəti müzakirə edib və Rusiyanın tətbiq etdiyi məhdudiyyətlərin yaxın zamanda aradan qaldırılmaya biləcəyi, əksinə daha da sərtləşdirilə biləcəyi ehtimalını nəzərə almağı tapşırıb.
Son günlər Ermənistanın iqtisadiyyat naziri müxtəlif açıqlamalarında ixrac problemlərinin həll olunacağına, məhsulların Avropa bazarına çıxarılacağına və daxili bazarda qiymət üstünlüklərinin qorunacağına dair optimist fikirlər səsləndirib. Lakin mənbələr hesab edir ki, hökumətin bu açıqlamaları ölkədə seçkiqabağı dövrdə ictimai narahatlığı azaltmağa yönəlmiş siyasi mesajlar kimi qiymətləndirilə bilər.
Qeyd edək ki, bu məlumatlar rəsmi şəkildə təsdiqlənməyib və əsasən hökumətə yaxın mənbələrin iddialarına əsaslanır.
