Yeni neft quyularında optimallaşdırma işləri aparılır

SOCAR-ın “Azneft” İstehsalat Birliyi hazırda balansında olduğu bütün yataqlar üzrə yeni quyuların planlaşdırılmasında yüksək hasilat və iqtisadi səmərəliliyin artırılması üçün optimallaşdırma işləri aparır. 

TodayPress TV “Azneft”ə istinadən xəbər verir ki, yüksək maili və horizontal quyuların qazılması imkanları genişləndirilir. 

““Pirallahı” yatağında horizontal qazma və süzgəclə tamamlama sayəsində qazmadan istismara verilən quyu üzrə günəlik 2,5 dəfə hasilat artımı gözlənilir”, - məlumatda qeyd olunur. 

Qeyd edək ki, hazırda “Azneft” İB-in tərkibində “Neft Daşları”, “28 May”, N.Nərimanov adına, “Abşeronneft”, “Siyəzənneft”, “Bibiheybətneft”, Ə.C.Əmirov adına neft-qazçıxarma idarələri, Qaz Emalı Zavodu, Qaz Anbarlarının İstismarı İdarəsi, Dalma Qurğularının Təmiri və Kirayəsi üzrə Eksperimental İstehsalat Müəssisəsi, Dalğıc Xidməti, Maddi Texniki Təchizat İdarəsi, 1 və 2 saylı İxtisaslaşdırılmış Neft-Mədən və Xüsusi Texnika İdarələri fəaliyyət göstərir.

01 yanvar 2024-cü il tarixinə olan məlumata görə, “Azneft” İB fəaliyyət sferasında, ümumilikdə, 21-i dənizdə, 28-i isə quruda olmaqla 49 neft və qaz yatağı mövcuddur.

Bunlardan 28-i (13-ü dənizdə, 15-i quruda) işlənmədədir.