Cənubi Qafqazda balans dəyişir: Vaşinqtonun Zəngəzur dəhlizi marağı...

“ABŞ-nin Zəngəzur dəhlizi üzərində nəzarət istəyi regionda yeni qarşıdurmalar yarada bilər”.

Politoloq Elşad Mirbəşiroğlu bu fikri TodayPress TV-yə açıqlamasında səsləndirib.

O bildirib ki, Vaşinqtonun Zəngəzur dəhlizinə nəzarət etmək niyyəti Cənubi Qafqazda geosiyasi və geoiqtisadi balansı dəyişdirə bilər:

“ABŞ-nin Zəngəzur dəhlizi üzərində nəzarəti ələ almaq istəyi, şübhəsiz ki, Cənubi Qafqazda tamamilə yeni geosiyasi və geoiqtisadi reallıqlar yarada bilər. Amma bu, eyni zamanda bölgədə gərginlik elementlərinin artmasına səbəb ola bilər. Çünki regionda hər bir dövlətin öz maraqları var. Xüsusilə Rusiya və İranın bu məsələyə münasibəti önəmlidir. Türkiyənin isə bu mərhələdə rəsmi mövqeyi açıqlanmayıb”.

Ekspert bildirib ki, Ermənistan tərəfi belə bir təşəbbüsün olmadığını desə də, ABŞ-nin Türkiyədəki səfiri Tom Barrak Vaşinqtonun Zəngəzur dəhlizinə 100 il müddətinə nəzarət etməyə hazır olduğunu bəyan edib:

“Bir neçə gün əvvəl məlumat yayılmışdı ki, ABŞ-nin logistika şirkətlərindən biri 32 kilometrlik dəhlizi icarəyə götürərək nəzarəti həyata keçirə bilər. Bu da onu göstərir ki, məsələ ciddi səviyyədə müzakirə olunur”.

Politoloq Zəngəzur dəhlizinin yalnız Azərbaycanla Naxçıvanı birləşdirən yol kimi deyil, daha geniş regional və beynəlxalq kommunikasiyanı təmin edən xətt kimi dəyərləndirilməli olduğunu bildirib:

“Zəngəzur dəhlizi Orta Asiyaya və Çinə çıxışı təmin edən unikal bir nəqliyyat marşrutudur. Gələcəkdə bu dəhliz regionda reallaşdırılan iri logistik layihələrin əsas komponentlərindən birinə çevrilə bilər. Bu isə onun üzərində nəzarəti geosiyasi baxımdan olduqca vacib edir. Bu təşəbbüs təkcə iqtisadi deyil, geosiyasi maraqlarla bağlıdır. Əgər reallaşarsa, ABŞ bu platformadan öz məqsədləri üçün də istifadə edə bilər”.

Politoloq Azərbaycanın buradakı mövqeyini əsas amil kimi qiymətləndirib:

“Azərbaycan regionda sabitlik və əməkdaşlıq platformalarının qurulmasında maraqlıdır. Bakı eyni zamanda bu bölgəni geosiyasi qarşıdurma meydanına çevirmək istəmir və belə imkanların qarşısını almaq üçün bütün resurslarını səfərbər etməyə hazırdır”. 

Sonda Elşad Mirbəşiroğlu bildirib ki, Zəngəzur dəhlizi ilə bağlı qərarlar yalnız Azərbaycan və Ermənistan arasında, üçüncü tərəflərin müdaxiləsi olmadan qəbul olunmalıdır. Bu məsələ xarici nəzarətdən kənarda, yalnız iki ölkənin razılaşması əsasında həll olunmalı və formalaşacaq nəqliyyat dəhlizindən sülh və inkişaf üçün istifadə edilməlidir. Azərbaycan bu yanaşmanı əsas tutaraq öz müstəqil siyasətinə və güclü mövqeyinə arxalanaraq regionun təhlükəsizlik arxitekturasının formalaşmasında aktiv rol oynayır.

Qiymət Mahir