Səhər yeməyinin vaxtı ömrümüzə təsir edir? – Alimlər AÇIQLADI

Alimlər səhər yeməyinin vaxtının ömür uzunluğu ilə əlaqəli olduğunu müəyyən ediblər.

TodayPress TV xəbər verir ki, bu barədə tədqiqat “European Journal of Clinical Nutrition” jurnalında dərc olunub.

Müəyyan edilib ki, gün ərzində ilk dəfə günortadan sonra yemək yeyənlərdə ölüm riski səhər saat 7-8-də səhər yeməyi yeyənlərlə müqayisədə 29% daha yüksək olub.

Tədqiqatçılar 1999-2018-ci illər arasında müşahidə edilən 40 yaşdan yuxarı 31 mindən çox amerikalı yetkinin məlumatlarını təhlil ediblər. Bu müddət ərzində təxminən 7 min nəfər, o cümlədən 2 mindən çox insan ürək-damar xəstəliklərindən vəfat edib.

Məlum olub ki, gec səhər yeməyi təkcə ümumi ölüm göstəricisi ilə deyil, həm də ürək-damar xəstəliklərindən ölüm halları ilə əlaqəlidir. Bu göstərici 46% daha yüksək olub. Ömür uzunluğu baxımından fərq təxminən 2,46 il təşkil edib. Gec səhər yeməyinə üstünlük verənlər 50 yaşa çatdıqda orta hesabla bu qədər “az yaşayırdılar”. Hətta səhər saat 8-10 arasında səhər yeməyi yemək də 10% daha yüksək risklə, saat 10-dan günortaya qədər olan müddətdə isə 19% daha yüksək risklə əlaqələndirilib.

Alimlər bunu insanın nə yediyinin deyil, həm də nə vaxt yediyinin vacib olduğu daxili bioloji saatların fəaliyyəti ilə əlaqələndirirlər.

Gec şam yeməyi ilə bağlı da oxşar qanunauyğunluq aşkar edilib. Gecə yarısından sonra qida qəbul etmək axşam saat 7-8-də şam yeməyi ilə müqayisədə ölüm riskini 27% artırıb.

Aysel Mətləb