Derbi və revanş – ÇL-də həyəcan pik həddə!

Bu gün UEFA Çempionlar Liqasında (ÇL) 1/4 final mərhələsinin ilk oyunlarına yekun vurulacaq.

TodayPress TV xəbər verir ki, ikinci oyun günündə daha iki maraqlı qarşılaşma baş tutacaq. 

“Pari Sen-Jermen” “Park de Prens”də “Liverpul"u, “Barselona” isə “Kamp Nou”da “Atletiko”nu qəbul edəcək. 

Başqa sözlə, Barselonada ispan derbisi, Parisdə isə ötənilki pley-off qarşılaşmasının təkrar oyunu baş tutacaq.

“BARSELONA” – “ATLETİKO” 

Bu komandaların UEFA turnirlərində əvvəlki bütün qarşılaşmaları da Çempionlar Liqasının 1/4 final mərhələsinə təsadüf edib. “Atletiko” hər iki dueldə qalib gəlib – Madrid təmsilçisi 2013/14 mövsümündə iki oyunun cəminə görə 2:1 (səfərdə 1:1, evdə 1:0) və 2015/16 mövsümündə 3:2 (səfərdə 1:2, evdə 2:0).

“Barselona” üçün bu, avrokuboklarda həmyerlilərə qarşı 25-ci oyundur (Q7 H6 M11), “Atletiko” üçün isə 26-cı (Q11 H5 M9).

“Barselona” ispan klubları ilə 11 iki oyunlu qarşılaşmanın yalnız 4-də mərhələ adlaya bilib və son 11 matçın cəmi üçünü qazanıb (H3 M5).

Kataloniya təmsilçisi avrokuboklarda son 18 ev oyunundan yalnız ikisini uduzub (Q13 H3).

“Barselona” Çempionlar Liqasında son 30 oyunun yalnız 1-də qol vura bilməyib, lakin artıq 13 oyundur qapısını toxunulmaz saxlaya bilmir.

“Atletiko” ispan klubları ilə 10 iki oyunlu duelin 5-də qalib gəlib və 5-də uduzub. “Hindular” son 7 matçda isə cəmi iki məğlubiyyət alıb (Q4 H1).

Madrid təmsilçisi avrokuboklarda son 7 səfər oyununun yalnız 1-də qalib gəlib (H2 M4).

“PARİ SEN-JERMEN” – “LİVERPUL”

PSJ və “Liverpul” altı dəfə qarşılaşıb və hər iki komanda üç qələbə qazanıb. Lakin iki oyunlu duellərdə Paris təmsilçisi rəqibindən üstün olub: 1996/97 mövsümündə Kubok Qalibləri Kubokunun yarımfinalında (ümumi 3:2) və ötən mövsüm Çempionlar Liqasının 1/8 finalında penaltilər seriyasında.

PSJ İngiltərə klublarına qarşı son 10 oyunun yalnız 1-də uduzub (Q7 H2). Komanda son 7 matçda məğlubiyyət yaşamayıb (Q5 H2). PSJ-nin evdə Premyer Liqa təmsilçilərinə qarşı keçirdiyi 5 oyunda 4 qələbə və 1 heç-heçə var.

Fransa nəhəngi ingilislərlə son dörd iki oyunlu qarşılaşmanın hamısında qalib gəlib. Ötən mövsüm “Liverpul”, “Aston Villa” və “Arsenal”ı mübarizədən kənarlaşdıran PSJ, cari mövsümdə 1/8 finalda “Çelsi”ni keçib.

Paris təmsilçisi Çempionlar Liqasının son dörd 1/4 finalında qalib gəlib və turnirdə ardıcıl altı iki oyunlu dueldə üstün olub.

“Liverpul” Fransa klublarına qarşı son 11 oyunun 7-də qalib gəlib (H1 M3).

“Mersisaydlılar” Çempionlar Liqasının son səkkiz 1/4 finalının 6-da qalib olub.

“Liverpul”un avrokuboklarda fransızlara qarşı keçirdiyi 36 oyunun heç biri 0:0 hesabı ilə başa çatmayıb.

Namiq HUN

TodayPress TV