Meksika Vaşinqton və Havana arasında vasitəçi qismində... – RƏY
Meksika Prezidenti Klaudiya Şeynbaum ölkəsinin ABŞ-nin Kubaya tətbiq etdiyi neft blokadası şəraitində Vaşinqton və Havana arasındakı dialoqda vasitəçi qismində çıxış etməyə hazır olduğunu bildirib.
Bəs Meksikanın bu vasitəçilik təşəbbüsü Vaşinqtonla münasibətlərdə gərginliyə səbəb ola bilərmi?
Mövzu ilə bağlı politoloq Aydın Quliyev TodayPress TV-yə danışarkən bildirib ki, Şeynbaumun bəyanatı Meksika ilə ABŞ arasında münasibətləri bir qədər gərginləşdirə bilər.
"Meksika Prezidentinin bu bəyanatı, həm öz ölkəsinin marağından, həm də Kuba ilə oxşar milli-etnik köklərə malik olan ölkələr kimi təəssübkeşlikdən doğan bir mövqedir", - deyə o vurğulayıb.
Analitikin sözlərinə görə, Amerikanın Kubaya tətbiq etdiyi enerji sanksiyaları ölkənin iqtisadiyyatını tamamilə çökdürüb. O qeyd edib ki, ABŞ Prezidenti Donald Tramp Venesuelanı ələ keçirəndən sonra Kubanın əsas təchizatçısı olan Havananı oyundan tam kənar vəziyyətdə qoyub.
İndiyə qədər Kubanı neftlə təmin edən ölkələrdən birinin də Meksika olduğunu xatırladan siyasi şərhçi bildirib ki, Trampın Kubaya tətbiq etdiyi sanksiyalar Meksikanın özünün də Kubaya benzin-neft satışını məhdudlaşdırıb:
"Şeynbaumun bu narahatlığı həm də ölkəsinin Kubaya benzin-neft sata bilməməsindən irəli gəlir. Ölkənin əsas sərvətinin bazarı məhdudlaşdırılırsa, bu, qazancın azalması deməkdir. Kuba isə enerji böhranını daha ağır şəkildə yaşamalı olur".
A. Quliyev əlavə edib ki, əgər bu bəyanat yalnız söz olaraq qalarsa, Amerika ilə Meksika arasında ciddi dəyişiklik baş verməyəcək. Lakin Şeynbaum bu bəyanata uyğun konkret addımlar atarsa, yəni hüquqi və ya diplomatik-siyasi müstəvidə Kubanı neftlə-benzinlə təchiz etmək istiqamətində təşəbbüs göstərərsə, bu, iki ölkə arasında münasibətləri daha da gərginləşdirə bilər.
Siyasi analitik qeyd edib ki, dövlətlər arasındakı münasibətlər onsuz da gərgindir və bu gərginliyin kökləri daha dərinə gedir.
Aysel Mətləb
