Kreml Ermənistanı "KÜNCƏ SIXIR" - Qaz 600 dollar olacaq?
Rusiya Prezidenti Vladimir Putin və Ermənistan Baş naziri Nikol Paşinyan görüşündən sonra Rusiya Baş nazirinin müavini Aleksey Overçuk “TASS”a müsahibə verib. O, Rusiyanı Ermənistanla bağlı narahat edən əsas məqamlara toxunub. Xüsusilə “Əgər Rusiya şirkətləri Ermənistanda pul qazana bilmirsə, niyə erməni iş adamları Rusiyada qazanırlar?” fikri, Metsamor AES-i, dəmir yolu konsessiyası məsələsi və Ermənistanın Avropa İttifaqına inteqrasiyası ilə bağlı düşüncələri diqqət çəkib.
Maraqlıdır, Rusiya bundan sonra hansı addımları ata bilər?
Sözügedən mövzunu politoloq Elçin Xalidbəyli TodayPress TV-yə şərh edib.
O bildirib ki, Nikol Paşinyanın Moskvaya səfəri Rusiyanın Ermənistana yönəlik təhdidləri fonunda baş tutub:
"Vladimir Putin Paşinyanı dolayısı yollarla təhdid edib. O, Ermənistana satılan qazın dünya bazarındakı qiymətdən aşağı olduğunu vurğulayıb: dünya bazarında 600 dollar olan qaz Ermənistana 177 dollara satılır. Putin bununla eyham vurub ki, əgər bu vəziyyət davam edərsə, qiymətlər dünya bazarına uyğunlaşdırıla bilər və bu, Ermənistan üçün sarsıdıcı maliyyə zərbəsi ola bilər".
Analitik qeyd edib ki, digər tərəfdən, Putin Ermənistanla Rusiya arasında 11 milyard dollarlıq ticarət dövriyyəsinin olduğunu və bunun təxminən 7 milyardının Ermənistanın kənd təsərrüfatı məhsullarının Rusiyaya idxalına aid olduğunu vurğulayıb:
"Bununla da o, eyham vurub ki, əgər Paşinyan hakimiyyəti indiki siyasi kursunu davam etdirərsə, həmin 7 milyard dollarlıq kənd təsərrüfatı məhsulları Rusiyaya ixrac olunmaya bilər və bu, Ermənistan iqtisadiyyatı üçün ciddi zərbə olar".
O, vurğulayıb ki, Rusiya tərəfi həmçinin, Avropa Birliyinə yaxınlaşma və Avrasiya İqtisadi İttifaqında fəaliyyətin paralel xarakter daşıya bilməyəcəyini xəbərdarlıq edir:
"Bu, Rusiyanın Ermənistanı Avrasiya İqtisadi İttifaqı çərçivəsində mövcud olan güzəştlərdən məhrum etməklə təhdid etməsi deməkdir. Ümumilikdə götürsək, Rusiyanın Ermənistana qarşı kifayət qədər ciddi təzyiq mexanizmləri mövcuddur".
Politoloqun qənaətincə, hələlik Paşinyan hakimiyyəti müqavimət göstərir və seçkiqabağı geriyə addım atmaq niyyətində deyil:
"Bununla belə, rəsmi İrəvan Rusiya və Qərb arasında balans siyasətini qorumağa çalışır. Halbuki Kremlin davranışlarından belə anlaşılır ki, artıq bu balans siyasəti effektiv deyil və yaxın vaxtlarda Ermənistana müəyyən problemlər yarada bilər".
Elçin Xalidbəyli hesab edir ki, seçki prosesi yaxınlaşdıqca Rusiyanın Ermənistana qarşı təzyiqləri daha da artacaq:
"Bu o deməkdir ki, Kremlin məqsədi Ermənistanla bağlı məsələni Rusiyanın xeyrinə birdəfəlik həll etməkdir. Yaxın bir-iki ay ərzində Ermənistan cəmiyyəti ölkələrinin gələcək taleyi ilə bağlı strateji seçim etmək məcburiyyətində qalacaq."
Politoloq sonda diqqətə çatdırıb ki, əgər Paşinyan hakimiyyəti seçkidə qalib gələrsə, Ermənistanın Qərbə yaxınlaşma siyasətinin davam edəcəyi şübhə doğurmur. Əks halda, Rusiyanın agentura şəbəkəsinə bağlı siyasi qüvvələr qalib gələrsə, Ermənistan yenidən Rusiyanın təsirinə düşəcək.
Jalə Rövşən
