Afrikanın ən qorxulu ilanı: Qara mambanın inanılmaz bacarıqları

Qara mamba Afrikanın ən təhlükəli ilanlarından biri olmaqla yanaşı, sürəti ilə də diqqət çəkir. Bu ilan açıq ərazidə saatda 15 kilometrə qədər sürətlə hərəkət edə bilir və dünyanın ən sürətli ilanı hesab olunur.

TodayPress TV xəbər verir ki, əsasən Şərqi Afrikanın quru kolluq ərazilərində yaşayan qara mamba təxminən 4 metrə qədər böyüyə bilir. Bədənini “S” formasında hərəkət etdirərək səthdəki maneələrdən itələnir və yüksək sürət yığır.

Qara mambanın təhlükəsi yalnız sürəti ilə bağlı deyil. Onun güclü neyrotoksik zəhəri sinir sisteminə təsir edir. İlan eyni zamanda ağaclara rahatlıqla dırmaşa və kiçik məməliləri yuvalarında təqib edə bilir.

Mütəxəssislər bildirirlər ki, qorxulu reputasiyasına baxmayaraq, qara mamba adətən insanlardan uzaq durmağa çalışır. Onun əsas üstünlüyü isə təhlükə zamanı sürətlə hərəkət edə bilməsidir.

Kübra Musayeva