Nurməhəmmədov karyerasının ən vacib qazancını açıqladı!
Həbib Nurməhəmmədov MMA-dan ciddi zədələr almadan ayrıldığı üçün özünü xoşbəxt hiss etdiyini bildirib.
TodayPress TV xəbər verir ki, Nurməhəmmədovun sözlərini X sosial şəbəkəsində fəaliyyət göstərən FREAK.MMA hesabı yayıb.
UFC-nin Şöhrət Zalının üzvü və yüngül çəkidə sabiq çempion Həbib Nurməhəmmədov karyerasını sağlam vəziyyətdə başa vurmasının onun üçün böyük üstünlük olduğunu deyib.
“Döyüşlərdə heç vaxt ciddi zərbə almamışam. Həmişə yaxşı formada olmuşam, üzüm də qaydasında qalıb və qələbələrimdən zövq almışam. Bədənimə gəlincə, 100 faiz sağlam olduğumu deyə bilmərəm. Amma karyerasını başa vurarkən ciddi beyin və bədən zədələri alan digər döyüşçülərlə müqayisədə çox yaxşı vəziyyətdəyəm”, – deyə Nurməhəmmədov bildirib.
Qeyd edək ki, “Qartal” ləqəbli idmançı son döyüşünü 24 oktyabr 2020-ci ildə keçirilən UFC 254 turnirində keçirib. Həmin görüşdə onun rəqibi ABŞ təmsilçisi Castin Getji olub.
Nurməhəmmədov ikinci raundda boğucu fəndlə qalib gələrək peşəkar karyerasındakı 29-cu qələbəsini qazanıb. Döyüşdən sonra isə MMA-dan ayrıldığını açıqlayıb.
Namiq HUN
