D LİQASI GERİDƏ QALIR: AZƏRBAYCAN MİLLİSİNİN QARŞISINDA YENİ YOL! – TƏHLİL
Azərbaycan cari mövsüm D Liqasının D2 qrupunda Litva və Lixtenşteynlə mübarizə aparır. UEFA-nın rəsmi məlumatına görə, 2026/27-ci illər mövsümündə D Liqasındakı bütün komandalar 2028/29-cu illər mövsümü üçün C Liqasına yüksələcək.
Bu səbəbdən Azərbaycan üçün bu turnirdə əsas məsələ yalnız “yuxarı liqaya yüksəlmək” deyil. Çünki yüksəliş onsuz da təmin olunur. Əsas məqsəd qrupu lider bitirmək, yeni komandanın real gücünü göstərmək və daha yüksək səviyyəli rəqiblərlə oynamaq üçün mövqeni yaxşılaşdırmaqdır.
3 oyundan 5 xal toplayan Azərbaycan hazırda qrupun lideridir. Qarşıda yalnız Lixtenşteyn – Azərbaycan oyunu qalır. Millimiz Lixtenşteyn üzərində qələbə ilə qrupun taleyini öz əlində saxlayacaq.
UEFA 2028/29-cu illər mövsümündən etibarən Millətlər Liqasını üç liqalı sistemə keçirir. 2026/27-ci illər mövsümündəki xüsusi yüksəlmə-düşmə mexanizminin əsas məqsədi növbəti formatda hər liqada 18 komandanın formalaşmasını təmin etməkdir.
C Liqası artıq Azərbaycan millisinin qarşısında daha ciddi rəqiblərlə oynamaq üçün yeni mərhələ açacaq.
D Liqasında Litva və Lixtenşteynlə oyunlar komandaya nəticə qazanmaq imkanı verir. C Liqasında isə rəqiblərin səviyyəsi yüksələcək. Bu da komandamız üçün daha ciddi test olacaq. Başqa sözlə, hazırkı turnir bir növ keçid mərhələsidir.
Azərbaycan əvvəlcə D Liqasını uğurla başa vurmalı, daha sonra isə C Liqasında özünü təsdiqləməlidir.
Ən böyük problem: nəticə ilə oyun keyfiyyəti arasında fərq
Azərbaycanın üç oyundan sonra 5 xal toplaması ilk baxışda pis nəticə deyil. Milli komanda Litva ilə səfərdə heç-heçə edib, daha sonra həmin rəqibə Bakıda qalib gəlib. Amma burada başqa göstərici diqqət çəkir:
3 oyunda cəmi 2 qol.
Komanda nəticə əldə etməyə başlayıb, amma hücum məhsuldarlığı hələ istənilən səviyyədə deyil. Xüsusilə Lixtenşteynlə Bakıda keçirilən 0:0-lıq qarşılaşma bu baxımdan ciddi siqnal idi. Belə oyunlarda Azərbaycan topa sahib olsa belə, üstünlüyü qola çevirməlidir. Litva üzərində qələbə isə çox vacib mesajdır. Burada mənzərəni yalnız 1:0 hesabı ilə qiymətləndirmək düzgün olmaz. Azərbaycan əvvəlcə Litva ilə səfərdə 1:1 oynadı, daha sonra isə Bakıda həmin rəqibi məğlub etdi. Bu, yeni komanda üçün müsbət göstəricidir.
Çünki komandanın:
- səfərdə xal götürməsi;
- eyni rəqibə qarşı ikinci oyunda taktiki yanaşmanı dəyişməsi;
- rəqibi ikinci matçda qapısında saxlaya bilməsi;
- qələbə üçün lazım olan bir qolu tapması müəyyən inkişafdan xəbər verir.
Yəni Azərbaycan millisinin nəticə baxımından əvvəlki iki oyuna nisbətən daha yetkin göründüyünü söyləmək olar. Ancaq 1:0-lar uzunmüddətli perspektivdə kifayət etməyəcək. D Liqasında belə nəticələrlə qrupda lider olmaq mümkündür. Amma C Liqasına keçdikdən sonra rəqiblərin səviyyəsi artacaq.
Orada Azərbaycan qarşısında daha çox:
- müdafiəni təşkil etmək;
- topa sahib olmaq;
- pressinqdən çıxmaq;
- hücumda müxtəlif planlara sahib olmaq;
- oyunu qola çevirmək tələbi yaranacaq.
Ona görə də bu Millətlər Liqası Ayxan Abbasovun komandası üçün sadəcə nəticə turniri deyil. Bu, həm də komandanın hansı səviyyəyə qədər inkişaf edə biləcəyini göstərən laboratoriyadır.
Qarşıdakı Lixtenşteyn – Azərbaycan oyunu kağız üzərində qrupun ən asan matçı kimi görünə bilər. Amma əslində Azərbaycan üçün turnirin ən vacib qarşılaşmalarından biridir. Azərbaycan Lixtenşteynə qalib gəlməlidir. Bu, həm qrup liderliyi, həm də yeni komandanın psixoloji baxımdan formalaşması üçün daha yaxşı ssenaridir.
Azərbaycanın qarşısında daha böyük hədəf var
UEFA 2026/27 Millətlər Liqasını AVRO-2028-in seçmə prosesi ilə əlaqələndirməyi nəzərdə tutur. Millətlər Liqasındakı nəticələr bəzi komandalar üçün Avropa çempionatının pley-off mərhələsinə əlavə yol yarada bilər. Bu səbəbdən Azərbaycan üçün turnirin dəyəri yalnız D Liqasında birinci olmaqdan ibarət deyil. Millətlər Liqasındakı hər nəticə milli komandanın gələcək Avropa çempionatı yoluna təsir edə biləcək daha böyük sistemin bir hissəsidir. Bu, xüsusilə uzun müddətdir böyük turnirin final mərhələsinə çıxa bilməyən Azərbaycan üçün əhəmiyyətlidir.
Yeni milli komandanın əsas müsbət tərəfinə gəlincə, məncə ən böyük üstünlük nəticə üçün mübarizə aparmaq qabiliyyətinin formalaşmasıdır. Hazırda komanda asan məğlub olan kollektiv təsiri bağışlamır. Azərbaycanın Litvaya qarşı ikinci oyunda qələbə qazanması yeni məşqçi korpusunun rəqibi daha yaxşı analiz etdiyini və oyunlar arasında düzəlişlər edə bildiyini göstərən müsbət məqam kimi qiymətləndirilə bilər. Azərbaycanın C Liqasında daha ciddi rəqiblərlə qarşılaşacağı nəzərə alınsa, hücum xəttində məhsuldarlığın artırılması vacibdir. Komanda müdafiə hesabına uzun müddət turnirdə qala bilər, amma yalnız müdafiə ilə qrup və turnir qazanmaq çətindir. Yeni millinin qarşısında əsas vəzifələrdən biri topa sahib olduğu vaxt daha çox təhlükə yaratmaq və yaratdığı imkanların daha böyük hissəsini qola çevirməkdir. Komandanı indidən yalnız nəticələrə görə mühakimə etmək tezdir.
Ayxan Abbasovun rəhbərliyi altında yeni heyətin formalaşması prosesi gedir. Əsas hədəf AVRO-2028 yolunda əlavə imkanlardan maksimum faydalanmaqdır. Bu baxımdan 2026/27 Millətlər Liqası Azərbaycan üçün son məqsəd yox, yeni milli komandanın qurulması üçün başlanğıc mərhələsidir.
Namiq HUN
