İsrailin saxladığı "Qlobal Sumud" fəalları İstanbula gətirildi

Aralıq dənizində Qəzzaya doğru irəliləyən "Qlobal Sumud" humanitar yardım donanmasının İsrail tərəfindən dayandırılmasından sonra saxlanılan fəallar Türkiyəyə gəliblər.

TodayPress TV xəbər verir ki, müxtəlif ölkələrdən olan 59 fəalı daşıyan Türk Hava Yollarına məxsus təyyarə Yunanıstanın Krit adasından qalxaraq İstanbul Hava Limanına enib.

Sərnişinlər hava limanının VIP terminalında yaxınları və rəsmi şəxslər tərəfindən qarşılanıblar. Qarşılanmadan sonra fəalların İstanbul Baş Prokurorluğu tərəfindən başladılan araşdırma çərçivəsində İstanbul Məhkəmə Tibb İnstitutunda tibbi müayinədən keçəcəkləri gözlənilir.

Türkiyə Xarici İşlər Nazirliyindəki mənbələrin bildirdiyinə görə, tibbi yoxlamalar səbəbindən təyyarəyə minə bilməyən daha iki Türkiyə vətəndaşının mayın 2-si ölkəyə qayıtması gözlənilir.

Təyyarənin göyərtəsində olan 59 fəalın vətəndaşlıq mənsubiyyəti belədir: Türkiyə (18), ABŞ (4), Argentina (5), Avstraliya (2), Bəhreyn (1), Braziliya (2), Böyük Britaniya (6), Niderland (1), İspaniya (3), İtaliya (2), Malayziya (10), Meksika (1), Pakistan (1), Çili (1) və Yeni Zelandiya (2).

Aysel Mətləb

TodayPress TV