İstanbulda mühüm görüş: "Qərbin maraqları Ukraynanı qane etmir" - RƏY
Ukrayna Prezidenti Volodimir Zelenski türkiyəli həmrakı Rəcəb Tayyib Ərdoğanla substantiv danışıqlara başladığını və İstanbulda mühüm görüşlərin planlaşdırıldığını qeyd edib:
"İstanbula gəldim, burada mühüm görüşlər planlaşdırılıb. Türkiyə Prezidenti Rəcəb Tayyib Ərdoğanla substantiv danışıqlar hazırlanıb. İnsanların həyatının real müdafiəsini təmin etmək, Avropamızda, eləcə də Yaxın Şərqdə sabitliyi irəli aparmaq və təhlükəsizliyə zəmanət vermək üçün tərəfdaşlığımızı gücləndiməyə çalışırıq. Birgə səylər həmişə ən yaxşı nəticələr verir".
Politoloq Mütəllim Rəhimli Ukrayna liderinin fikirlərini TodayPress TV-yə şərh edib.
Analitik bildirib ki, Ukrayna Prezidenti Volodimir Zelenski müharibənin dayandırılması istiqamətində fəal cəhdlər göstərsə də, prosesin ədalətli şəkildə başa çatmasını istəyir. Avropalı vasitəçilər və ABŞ-nin iştirakı ilə aparılan danışıqlarda əsas diqqət Ukraynanın deyil, bu aktorların öz maraqlarına yönəlir. Onun sözlərinə görə, həm ABŞ, həm də Avropa İttifaqına (Aİ) üzv ölkələr müharibənin tezliklə bitməsi üçün daha çox öz siyasi və geosiyasi maraqlarını ön plana çıxarırlar.
Siyasi şərhçi qeyd edib ki, Zelenski artıq bu reallıqları görür və anlayır ki, mövcud şəraitdə daha balanslı və ədalətli mövqe sərgiləyən əsas tərəf Türkiyədir:
“Üç il əvvəl taxıl dəhlizinin açılması və Ukraynadan taxıl ixracı ilə bağlı razılaşmanın məhz İstanbulda əldə olunması da Türkiyənin bu məsələdə oynadığı mühüm rolu göstərir. Həmin dövrdə İstanbul danışıqlarında Ukraynanın maraqlarına uyğun bir sıra təkliflər də irəli sürülmüşdü”.
Ekspertin sözlərinə görə, sonradan məlum olub ki, bu prosesin reallaşmasına müəyyən xarici təsirlər mane olub və o dövrdə Böyük Britaniyanın Baş naziri Boris Consonun bu razılaşmanın həyata keçməsinə imkan vermədiyi iddia olunur. Politoloq bildirib ki, həmin mərhələdə Ukrayna tərəfinə daha sərfəli şərtlərlə sülhün mümkün olacağı ilə bağlı fərqli yanaşmalar təqdim olunub.
M. Rəhimli vurğulayıb ki, bütün bu cəhdlərə baxmayaraq, müharibə hələ də davam edir və gözlənilən nəticələr əldə olunmayıb. Bu səbəbdən Zelenski yenidən Türkiyə ilə fəal təmaslara üstünlük verir və Prezident Rəcəb Tayyib Ərdoğanla danışıqlarda maraqlıdır. Analitik hesab edir ki, Türkiyənin siyasəti həm Yaxın Şərqdə, həm də Rusiya-Ukrayna müharibəsində mülki əhalinin qorunmasına və ədalətli sülhün təmin olunmasına yönəlib.
"Qarşıdakı görüşlərdə Zelenski və Ərdoğan arasında əsas müzakirə mövzusu da məhz müharibənin dayandırılması və ədalətli sülhün əldə olunması olacaq”, - deyə politoloq izah edib.
Aysel Mətləb
