“Təzyiq qəbul edilə bilməz!” – Millət vəkili

“Bir çox regional liderlər böhranlı vəziyyətlərdə diplomatik ifadələri yumşaltmağa çalışdıqları halda, Prezident İlham Əliyev mövqeyini açıq şəkildə ifadə edir və təhlükəsizlik məsələlərində kompromisə getmədiyini nümayiş etdirir”.

Milli Məclisin deputatı Jalə Əliyeva bunu TodayPress TV-yə danışarkən deyib.

Pralamentari vurğulayıb ki, Prezidentin Təhlükəsizlik Şurasının iclasındakı çıxışında diqqət çəkən əsas məqam Azərbaycanın təhlükəsizliyinə qarşı hər hansı təhdidin cavabsız qalmayacağı barədə açıq və birmənalı mövqenin ortaya qoyulması idi.

“Bu, diplomatik ritorikanın sərt və aydın şəkildə ifadə olunması ilə yanaşı, dövlətin suverenlik və təhlükəsizlik məsələlərində kompromisə getməyəcəyini göstərən mühüm siyasi mesajdır”.

Deputat bildirib ki, Azərbaycanın ərazi təhlükəsizliyi və sərhəd toxunulmazlığı məsələsinin Prezident tərəfindən “qırmızı xətt” kimi təqdim edilməsi beynəlxalq auditoriya üçün də aydın mesajdır.

“İsrail analitikləri qeyd edirlər ki, Azərbaycan həm regional güclərlə münasibətlərini balanslaşdırır, həm də milli maraqlar məsələsində qətiyyətli mövqe nümayiş etdirir”.  

O, həmçinin bildirib ki, Azərbaycanın yerləşdiyi geosiyasi məkan son illərdə xüsusilə həssas təhlükəsizlik mühiti ilə xarakterizə olunur. Cənubi Qafqaz regionunda enerji marşrutları, hərbi-siyasi balans və böyük güclərin maraqları bir-biri ilə kəsişir. Bu baxımdan Prezidentin sərt və prinsipial ritorikası həm daxili sabitliyi təmin etmək, həm də xarici aktorlara aydın siqnal göndərmək məqsədi daşıyır.

“Analitiklər hesab edirlər ki, bu mövqe Azərbaycanın son illərdə formalaşdırdığı aktiv və müstəqil xarici siyasət kursunun davamıdır. Dövlət başçısı beynəlxalq platformalarda da dəfələrlə vurğulayıb ki, ölkənin təhlükəsizliyi və suverenliyi məsələsində heç bir təzyiq qəbul edilə bilməz. Başqa sözlə, Təhlükəsizlik Şurasının iclasında səsləndirilən fikirlər yalnız konkret bir hadisəyə reaksiya deyil, eyni zamanda Azərbaycanın regional siyasətinin prinsipial xəttini nümayiş etdirən strateji siyasi bəyanat kimi qiymətləndirilə bilər”, - millət vəkili fikrini sonlandırıb.  

Jalə Rövşən