Dörd Avropa ölkəsi xəbərdarlıq etdi: İordan çayının qərb sahilində vəziyyət kəskin pisləşib
İtaliya, Böyük Britaniya, Fransa və Almaniya son aylarda işğal altındakı İordan çayının qərb sahilində vəziyyətin "kəskin şəkildə pisləşməsi" ilə bağlı xəbərdarlıq ediblər.
TodayPress TV xəbər verir ki, ölkələr buna səbəb kimi sülh perspektivlərini sarsıdan İsrail siyasətini göstəriblər.
Dörd Avropa ölkəsinin birgə bəyanatında bildirilir ki, İsrailin məskunlaşma fəaliyyəti — o cümlədən "E1" adlandırılan zonada planlaşdırılan tikinti layihəsi beynəlxalq hüququ pozacaq, ərazinin daha da parçalanmasına səbəb olacaq və gələcəkdə dayanıqlı Fələstin dövlətinin qurulması imkanını təhlükə altına qoyacaq.
"E1" sahəsi təxminən 12 kvadratkilometr (4,6 kvadratmil) ərazini əhatə edir və İordan çayının qərb sahilində, Şərqi Qüds ilə Maale-Adumim yəhudi məskunlaşma məntəqəsi arasında yerləşir. İsrail hakimiyyəti bu məntəqə ilə Qüds arasında əlaqəni gücləndirmək üçün orada minlərlə yaşayış sahəsi və müvafiq infrastruktur tikməyi planlaşdırır.
Ölkələr, həmçinin kommersiya şirkətlərinə bu cür məskunlaşma layihələrində iştirak etməmək barədə xəbərdarlıq edib və bunun mümkün hüquqi, eləcə də reputasiya itkiləri ilə nəticələnə biləcəyini qeyd ediblər.
Aysel Mətləb
