Dövlət sektorunun idxalda payı 2 dəfə artdı

Bu ilin yanvar-iyun aylarında Azərbaycana məhsul idxalın həcmi 11,5 milyard ABŞ dolları təşkil edib.

Bu barədə TodayPress TV-yə Dövlət Gömrük Komitəsindən məlumat əldə edib.

Məlumata görə, dövlət sektorunun idxalda payı 4,1 milyard ABŞ dolları olub. Bu, əvvəlki ilin eyni dövrü ilə müqayisədə 2,1 milyard ABŞ dolları, yaxud da 2 dəfə çoxdur.

Belə ki, 2024-cü ilin birinci yarısında Azərbaycana 8,9 milyard ABŞ dolları dəyərində məhsul idxal edilmişdi ki, bunun da dövlət sektoruna düşən payı 2 milyard ABŞ dolları olmuşdu.

Hesabat dövründə dövlət sektoru tərəfindən idxal əməliyyatları ümumi idxalın 35,88-ini təşkil edib.

Qeyd edək ki, 2025-ci ilin yanvar-iyun aylarında Azərbaycan xarici ölkələrlə 24,4 milyard ABŞ dolları dəyərində ticarət əməliyyatı aparıb. Bu göstərici ötən ilin eyni dövrünə nisbətən 2,632 milyard ABŞ dolları və ya 12,1% çoxdur.

Xarici ticarət dövriyyəsinin 12,878 milyard ABŞ dolları ixracın, 11,522 milyard ABŞ dolları isə idxalın payına düşüb. Son 1 ildə ixrac 0,2% azalıb, idxal isə 29,9% artıb.

Nəticədə, xarici ticarətdə 1,356 milyard dollarlıq müsbət saldo yaranıb. Bu da illik müqayisədə 2,677 milyard ABŞ dolları və ya 3 dəfə azdır.