Zəhra Pezeşkian: “Rəqəmsal mühitdə uşaqların təhlükəsizliyi qlobal çağırışdır”
“Müasir texnologiyalar geniş imkanlar açsa da, uşaqlar üçün ciddi risklər də yaradır”.
TodayPress TV xəbər verir ki, bunu İran İslam Respublikasının Prezidentinin qızı Zəhra Pezeşkian “Rəqəmsal mühitdə uşaqların müdafiəsi: Müasir alətlər və beynəlxalq əməkdaşlıq konfransı”nda çıxışı zamanı deyib.
O bildirib ki, müasir dünyada texnologiya danılmaz üstünlüklərlə yanaşı, uşaqların təhlükəsizliyi, şəxsi həyatın toxunulmazlığı və sağlam inkişafı üçün ciddi çağırışlar yaradır:
“Birləşmiş Millətlər Təşkilatının Uşaq Hüquqları Konvensiyasına əsasən, hər bir uşaq təhlükəsiz və ədalətli mühitdə böyümək hüququna malikdir, lakin rəqəmsal məkanda bu fundamental hüququn pozulması riski daha da artır.
İranda beynəlxalq öhdəliklər praktik və məqsədyönlü addımlarla möhkəmləndirilib və uşaqların rəqəmsal mühitdə qorunması istiqamətində geniş tədbirlər həyata keçirilib. 1400-cü ildə Ali Rəqəmsal Məkan Şurası tərəfindən təsdiqlənmiş “Uşaqların və yeniyetmələrin rəqəmsal mühitdə qorunması sənədi” bu səylərin əsasını təşkil edir və Milli İnformasiya Şəbəkəsi çərçivəsində təhlükəsiz mühitin yaradılmasına yönəlib”.
Z.Pezeşkian çıxışda vurğulanıb ki, sözügedən sənəd məzmunun yaşa görə təsnifatı, ağıllı filtrləmə mexanizmləri və İran-İslam dəyərlərinə uyğun yerli məzmunun təşviqini nəzərdə tutur. Bundan əlavə, 1403-cü ildə qəbul edilmiş “İranlı uşaq və yeniyetmələr üçün rəqəmsal ekosistem siyasətnaməsi” yerli proqram təminatı və texnoloji həllərin dəstəklənməsi, məzmunun tənzimlənməsində süni intellektdən istifadə və rəqəmsal savadlılığın artırılmasını prioritet kimi müəyyən edir.
Zəhra Pezeşkian əlavə edib ki, hüquqi müstəvidə də uşaqların və yeniyetmələrin müdafiəsi haqqında qanunlarda, eləcə də kompüter və kiber cinayətlərə dair qanunvericilikdə onlayn istismar, təhqir və şəxsi həyatın toxunulmazlığının pozulması kimi əməllər cinayət məsuliyyəti yaradan hallar kimi təsbit olunub. Eyni zamanda, uşaqların təhlükəli internet mühitinə çıxışının qarşısını almaq məqsədilə rəqəmsal platformalar üçün yaş nəzarəti və təhlükəsizlik sistemlərinin tətbiqi istiqamətində işlərin davam etdirildiyini diqqətə çatdırıb.
Qiymət Mahir
